Ekitebyo 64

Sulemaani Okwombeka Hekalu

DAUDI atakafiire, akaha Sulemaani entebeekanisa yoona erikuruga ahari Ruhanga ey’okwombeka hekalu ya Yehova. Omu mwaka gwa kana ogw’obutegyeki bwe, Sulemaani akatandika kwombeka hekalu, kandi kikatwara emyaka mushanju n’ekicweka okugimara. Obukumi n’obukumi bw’abantu bayejumba omu kwombeka hekalu, kandi ekyombeko kyatwara esente nyingi munonga. N’ahabw’okuba ezaabu n’efeeza nyingi nibikoresibwa omu kwombeka oku.

Hekalu erimu ebishengye bibiri ebikuru, nk’oku eihema ryabaire riri. Kwonka ebi bishengye nibikira eby’omu ihema emirundi ebiri. Sulemaani ata eshanduuko y’endagaano omu kishengye eky’omunda ekya hekalu, kandi ebintu ebindi ebyabaire nibibiikwa omu ihema byabiikwa omu kindi kishengye.

Hekalu ku yaahweire kwombekwa, habaho obugyenyi buhango. Sulemaani yaatsimba amaju omu maisho ga hekalu atyo yaashaba, nk’oku orikureeba omu kishushani. Sulemaani yaagambira Yehova ati: ‘Hoona n’obu ryakuba eiguru ryona torikubaasa kurihikamu, kaashwa egi nju ei nyombekire! Kwonka, Ai Ruhanga wangye, naakweshengyereza ta omutima aha kushaba kw’abantu baawe baaba nibakushaba bari omu mwanya ogu.’

Sulemaani ku amara okushaba kwe, omuriro gwija kuruga omu iguru. Gwotsya ebitambo by’enyamaishwa ebi baatamba. Kandi okumurinkana kw’amaani kuruga ahari Yehova kwijura hekalu. Eki kyoreka ngu Yehova yaahurira, kandi ngu yaashemerererwa hekalu hamwe n’eshaara ya Sulemaani. Hekalu, ritari eihema hati eba omwanya ahu abantu barikuza kuramiza.

Okumara obwire buraingwa Sulemaani ategyeka omu muringo gw’obwengye, kandi abantu bashemererwa munonga. Kwonka Sulemaani ashwera abakazi baingi abatarikuramya Yehova kuruga omu nsi ezindi. Nooreeba aho omwe ahari bo orikuramya omu maisho g’ekishushani? Aha muheru abakazi be bamureetera nawe kuramya baaruhanga abandi. Noomanya ekyabaire ahari Sulemaani ku yaakozire eki? Takitwaza bantu omu muringo gw’embabazi. Ahinduka omushaarizi, kandi abantu tibagaruka kushemererwa.

Eki kireetera Yehova kwitirwa Sulemaani ekiniga, kandi amugambira ati: ‘Niinyija kukwihaho obugabe kandi mbuheereze ondiijo muntu. Eki tindikwija kukikora omu bunaku bwawe, kureka omu butegyeki bwa mutabani waawe. Kwonka tindikwija kwiha abantu boona ahari mutabani waawe.’ Ka tureebe oku eki kyabaireho.

1 Obusingye 28:9-21; 29:1-9; 1 Abagabe 5:1-18; 2 Obusingye 6:12-42; 7:1-5; 1 Abagabe 11:9-13.