ÄNTE dä du Dabid, bi xipi Salomon hanja mi ne Jeoba xä thokuäbi rä templo. Mꞌe̱fa de bi mända goho nje̱ya, Salomon bi mu̱di bi hyoki näꞌä templo, ꞌne bi zitsꞌi yoto nje̱ya mäde pa bi huati. Yä mꞌotho nuꞌu̱ yä ñꞌo̱ho̱ bi mpe̱fi ha näꞌä templo. Bi ja mꞌe̱di ndunthi rä bojä, po gatꞌho näꞌä rä oro ꞌne rä plata bi zitsꞌi.

Nunä templo mi pe̱ꞌtsi yoho yä kuarto ngu nuꞌu̱ mi pe̱ꞌtsi rä tabernäkulo. Pe nuꞌu̱ yä kuarto mi pe̱ꞌtsi näꞌä templo, mi yo mꞌiki mi yä däta ke nuꞌu̱ mi pe̱ꞌtsi rä tabernäkulo. Salomon bi mända dä ꞌme̱ꞌtsi näꞌä kaha de gä kohi ha näꞌä kuarto mi ja asta mbo de näꞌä templo. Nuꞌu̱ märꞌa yä kosa mi ja ha tabernäkulo, bi ꞌme̱ꞌtsi ha näꞌä mänꞌa kuarto.

Mi uadi näꞌä templo, bi nja nꞌa däta dängo. Ja ngu gi handi, Salomon bi ndandiñähmu rꞌandi de näꞌä templo ꞌne bi xatuäbi Jeoba njaua: “Nixi ha gatꞌho mähetsꞌi hindä za gi ñꞌe̱ni, ¡xihmä nunä templo dä hoki! Pe, mä zi Dada Jeoba, di bänteꞌi gi yꞌo̱de nuꞌmu̱ ri hnini dä xatäꞌi ha nunä luga”.

Mi uadi bi xadi Salomon, bä käi rä tsibi de mähetsꞌi pa bi tsätꞌi nuꞌu̱ yä ofrenda de gä zuꞌue xki thoki. ꞌNe Jeoba bi japi bi hue̱xki nꞌa ñotꞌi mbo ha gatꞌho rä templo. Njabu̱ bi neki ge Jeoba mi o̱de näꞌä sadi ꞌne mi johya ko näꞌä templo xki hyoki Salomon. Nubye̱, ha nunä templo, ja mi eheua yä israelita pa mi xo̱kämbeni Jeoba, ya hingä ha tabernäkulo.

Po ndunthi yä je̱ya, Salomon bi mända xä ñho, ꞌne yä jäꞌi xa mi johya. Pe Salomon bi nthätui ndunthi yä ꞌme̱hñä de märꞌa yä hnini nuꞌu̱ hingä mi nsunda Jeoba. ¿Gi handi nuni ꞌme̱hñä di ndäne nꞌa rä zidada hingä mäjuäni? Nuꞌu̱ yä ꞌme̱hñä bi uadi bi japi Salomon bi xo̱kämbeni märꞌa yä zidada. Nubye̱, ¿gi pädi te bi mu̱di bi thogi? Salomon bi mu̱di bi ntsꞌomꞌu̱i, hänge yä israelita ya himi ꞌmu̱i ko rä johya.

Jeoba bi nkue̱ ko Salomon ꞌne bi ꞌñembi: “Ma gä häkꞌäꞌi rꞌa yä hnini nuꞌu̱ gi mända, ꞌne go ma gä umbäbi mänꞌa. Pe hingä nubye̱ gi te, ma gä jabu̱ nuꞌmu̱ xti mända ri tsꞌu̱ntꞌu̱. Pe hingä ma gä hämbäbi gatꞌho nuꞌu̱ yä hnini”. Ma gä handihu̱ hanja bi thogi nuꞌu̱ yä tꞌo̱tꞌe.