CHIʼ majaʼ kkam David, xuya kan ri wuj che Salomón chilaʼ kubʼij wi su kraj ri Ajawaxel che kubʼan che ri loqʼalaj ja. Pa ukaj junabʼ rech uqʼatbʼaltzij, Salomón xuchaplej, o xumaj, ubʼanik ri loqʼalaj ja, xukoj wuqubʼ rukʼ nikʼaj junabʼ che ukʼisik ri loqʼalaj ja. Xechakun más che 180 mil achijabʼ rech xkebʼan ri ja, xkoj sibʼalaj qʼan pwäq rukʼ saq pwäq che, rumal laʼ sibʼalaj nim pwäq xkoj che.

Wajun loqʼalaj ja kʼo kebʼ alaj täq ja chupam nim ubʼantajik, junam che ri kʼo pa ri tabernáculo. Tekʼuriʼ e nim chi na chuwäch wariʼ. Salomón xutaq uyaʼik ri koxon rech ri pacto pa jun ja kʼisbʼal re kʼo chupam ri loqʼalaj ja.

Chiʼ xkʼis ubʼanik ri loqʼalaj ja, xbʼan jun nimqʼij. Salomón xukeʼik (xekek) chuwäch ri loqʼalaj ja tekʼuriʼ xubʼan jun chʼawem, junam che kʼo pa ri wachbʼäl. ‹Kkun ta ronojel ri kaj che achʼijik›, xchaʼ Salomón che Jehová, ‹xuqujeʼ ¿la kkun wajun loqʼalaj ja che achʼijik? Oh nuDios, chabʼana jun toqʼobʼ, chata ri kichʼawem ri atinamit chiʼ kepe waral›.

Chiʼ Salomón xukʼis ubʼanik ri uchʼawem, xqaj lo qʼaqʼ pa ri kaj. Xukʼatisaj ri täq chiköp rech ri tabʼal toqʼobʼ. Tekʼuriʼ jun saqalaj qʼaqʼ rech Jehová xnoj pa ri loqʼalaj ja. Wariʼ kukʼutu che Jehová tijan kuta ri chʼawem xubʼano, xkikotik che ri loqʼalaj ja, xuqujeʼ rumal ri uchʼawem Salomón. Kimik are ta chi ri tabernáculo, are ri loqʼalaj ja ri lugar chiʼ kepe wi ri tinamit che uyaʼik uqʼij ri Ajawaxel.

Pa kʼi täq junabʼ Salomón xubʼan jun ajqʼatbʼaltzij kʼo unojibʼäl, ri winaq xekikotik. Ri Salomón xkʼuleʼ kukʼ kʼi täq ixoqibʼ rech nikʼaj chik täq tinamit che kkeya ta uqʼij ri Jehová. Chawilampeʼ pa ri wachbʼäl che jun chike ri ixoqibʼ tijan kuya uqʼij jun tyox. Kʼisbʼal re wa täq ixoqibʼ xkebʼan che Salomón che xuya kiqʼij täq tyox. ¿La awetaʼm su xmajtaj ubʼantajik? Salomón xubʼan itzel winaq, kimik ri tinamit kekikotik ta chik.

Wariʼ xubʼano che Jehová sibʼalaj xpe riwal, o royowal, rukʼ Salomón, rumal laʼ xubʼij wariʼ che: ‹Kinwesaj chawe ri ajawbʼäl tekʼuriʼ kinya che jun chik winaq. Kinbʼan ta wariʼ pa akʼaslemal, are kinbʼan wariʼ pa ri uqʼatbʼaltzij akʼojol. Kinwesaj ta kʼut ronojel ri winaq pa ri ajawbʼäl›. Chqilampeʼ su kbʼantajik.