Tantara 64

Nanamboatse Tempoly Solomona

TALOHA’TY nahafatesane le fa natoron’i Davida an’i Solomona iaby ty fandahara mikasike ty fomba tean’i Jehovah hanamboara ty tempoline. Ka nanomboke nanamboatse tempoly io Solomona laha vo nifeno efatse tao ty naha-mpanjaka aze. Vita tanaty fito tao noho tampane tempoly io. Olo fa ho an’aline mahery ro niasa tamy tempoly io tao. Ka, drala maro biby kea ro lany tamy fanamboara aze, satria, maro biby ty volamena noho ty volafoty nampiasà tao.

Nisy efitse roe bevata manahake tamy tabernakely tao, ty amy tempoly io ao. Fe indroe’ty habe’ty efitse tamy tabernakely iny ty habe’ty efitse tamy tempoly io tao. Napetran’i Solomona tamy efitse raike tamy tempoly io ao, fiara’ty fanekea iny. Bakeo napetrake tamy efitse raike hafa kea, ty raha hafa tokone hatao amy tabernakely ao.

Nisy fety be laha fa nivita tempoly iny. Nandohalike taloha tempoly iny eo Solomona, sady nivavake, manahake ty hitanao amy sary io. Hoy ty asane tamin’i Jehovah: ‘Ndra lanitse iabiaby io aza, tsy ho tendrike anao, ka handrake tempoly toy. Fe, mangatake aminao lahy zahay, mba janjìno ty vahoakinao laha fa mandeha amy toera toy eto, hivavake aminao.’

Laha fa nivita vavake nataon’i Solomona iny, le nisy afo nilatsake baka an-danitse ane. Nilatsake tamy biby natao soro teo afo iny ka nandòro aze. Nandefa hazavà Jehovah, ka le nazava biby tamy tempoly ao. Hita tamy raha nataon’i Jehovah reo, fa nijànjy ty vavake nataon’i Solomona ie, sady teane tempoly namboarin’i Solomona io. Amy tempoly ao henany zao ro toera hivavàha’ty mpanompo-Ndranahare, fa tsy amy tabernakely ane sasy.

Tanaty fotoa elaela naha-mpanjaka an’i Solomona le nihendry soa avao ie, ka faly ty vahoake. Fe nanambaly ampela maro tsy nanompo an’i Jehovah, baka amy tany hafa ane Solomona. Hitanao va ty raike amin’ampela reo, mivavake amy sampy eo io? Nahavoatarike an’i Solomona hivavake tami-ndranahare hafa kea valine reo, tamy farane. Hainao va hoe ino ty raha niseho laha fa nanao raha zay Solomona? Tsy nisoa fanahy tamy vahoake reo sasy ie. Nanjary nasiake biby ie, ka nijaly ty vahoake.

Nimeloke bibike tamin’i Solomona, Jehovah noho’ty raha tsy mety nataone. Ka hoy ty asan’i Jehovah tamin’i Solomona: ‘Tsy hataoko mpanjaka sasy iha, fa olo hafa ro hisolo anao. Fe tsy hanao raha zay aho laha mbo velo iha, fa laha fa manjaka ty anake lahinao. Fe, tsy halàko hiala amy fanjakàn’ananao io eo iaby laha fa kila vahoake amy fanjakà io.’ Ndao ho henteantsika ty fomba nanatanteraha-Ndranahare raha zay.

1 Tantara 28:9-21; 29:1-9; 1 Mpanjaka 5:15-32; 2 Tantara 6:12-42; 7:1-5; 1 Mpanjaka 11:9-13.