NGEMBI kwekuba Davide afe, wanika Solomoni ipulani levela kuNkulunkulu yekwakha lithempeli laJehova. Ngemnyaka wesine wekubusa kwakhe, Solomoni wacala kulakha lelithempeli, futsi kwamtsatsa iminyaka lesikhombisa kulicedza. Emashumi etinkhulungwane temadvodza, tamsita ekulakheni. Lesakhiwo sasibita imali lenyenti, ngoba kwakusetjentiswe igolide kanye nesiliva ekusakheni.

Lelithempeli lalinemakamelo lamabili lamakhulu, njengoba lalinjalo nelithende lekukhontela. Kodvwa lawa wona bukhulu bawo bebuwaphindza kabili lawa elithende lekukhontela. Solomoni wafaka libhokisi lesivumelwane kulelinye lalamakamelo, kwatsi naleti letinye tintfo nato letatihlala ethendeni lekukhontela watifaka kuleli lelinye.

Kwatsi nasekuphelile kwakhiwa kwelithempeli, bantfu bonkhe bahalalisa. Solomoni waguca ngemadvolo embikwelithempeli wathandaza, njengoba umbona kulesitfombe. Watsi kuJehova: ‘Ngisho nemazulu laphakeme, ngeke wenele kuwo. Kangakanani-ke lelithempeli. Noko, Nkulunkulu, mane uwuve umthandazo bantfu bakho labawenta lana kulendzawo.’

Kutsite kube Solomoni acedze kuthandaza, kwehla umlilo uvela ezulwini, wefika washisa umnikelo wetilwane lobewulungisiwe. Kukhanya lokuvela kuJehova kwagcwala lithempeli. Loku kwakukhombisa kutsi abelalele, futsi abelijabulela lelithempeli kanye nalomthandazo Solomoni abewentile. Manje esikhundleni selithende lekukhontela, lithempeli laba yindzawo bantfu labacala kuta kuyo kutewukhonta.

Kwendlula iminyaka leminyenti Solomoni abusa kahle, futsi bantfu bebajabula. Kodvwa wabese sewushada nemakhosikati lamanyenti lavela kulamanye emave, labengamkhonti Jehova. Uyambona yini lomunye wawo lana esitfombeni akhulekela sithico? Ekugcineni emakhosikati akhe amenta wakhonta labanye bonkulunkulu. Uyati kutsi yini leyenteka ngalesikhatsi Solomoni asenta loko? Abengasabaphatsi kahle bantfu. Waba nenhlitiyo lembi, futsi loku kwayicedza injabulo yebantfu.

Loku kwenta kutsi Jehova amtfukutselele Solomoni, ngako wakhuluma naye watsi: ‘Njengoba sewente nje, ngitawutsatsa umbuso etandleni takho, ngiwunike lomunye umuntfu. Angeke ngikwente loko ngesikhatsi sakho, kodvwa ngiyawukwenta nasekubusa indvodzana yakho. Angeke ngiwutsatse wonkhe umbuso kuyo.’ Ase sibone kutsi loku kwenteka njani.