ANTES David mate, nia fó ba Salomão planu husi Jeová atu harii templu. Salomão komesa harii Jeová nia templu neʼe tinan haat depois nia sai liurai, no tinan hitu ho balun tuirfalimai, sira halo hotu. Ema rihun ba rihun serbisu atu harii templu. Sira gasta osan barak tebetebes atu harii uma neʼe, tanba uza osan-mean no osan-mutin barak.

Hanesan ho tabernákulu, templu mós iha sala rua neʼebé importante. Maibé, sala sira-neʼe boot liu fali dala rua sala tabernákulu nian. Salomão haruka amlulik sira atu tau arka aliansa nian iha sala ida, no sasán sira seluk husi tabernákulu iha sala ida.

Kuandu templu hotu tiha, sira halo festa boot. Salomão hakneʼak iha templu oin no halo orasaun, hanesan bele haree iha dezeñu neʼe. Salomão hatete ba Jeová: ‘Lalehan tomak latoʼo ba Ita, sá tan ho templu kiʼik neʼe. Maibé, haʼu-nia Maromak, favór ida rona ba Ita-nia povu kuandu sira fila oin ba uma neʼe atu halo orasaun.’

Kuandu Salomão halo hotu orasaun, ahi tun husi lalehan. Ahi neʼe han animál hotu neʼebé sira fó nuʼudar sakrifísiu. No mós iha naroman husi Jeová halo templu tomak nabilan. Ida-neʼe hatudu katak Jeová rona, no mós nia kontente ho templu neʼe no Salomão nia orasaun. Agora povu la bá tan tabernákulu, maibé bá templu atu adora.

Salomão ukun iha dalan matenek ba tempu kleur, no povu kontente. Maibé, Salomão kaben ho feto barak husi rai seluk, neʼebé la adora Jeová. Bele haree ninia feen ida adora iha estátua nia oin ka lae? Ikusmai, Salomão nia feen sira halo nia adora maromak falsu sira. Hatene saida mak akontese bainhira Salomão halo nuneʼe? Nia la hatudu tan laran-diʼak ba povu. Nia sai ema laran-aat, no povu la kontente tan.

Ida-neʼe halo Jeová hirus ho Salomão, no Jeová hatete ba nia: ‘Haʼu sei foti fali reinu husi ó no fó ba ema seluk. Haʼu sei la halo nuneʼe kuandu ó sei moris, maibé haʼu sei halo kuandu ó-nia oan mak ukun. Haʼu mós sei la foti povu hotu husi ó-nia oan nia reinu.’ Mai ita haree oinsá mak ida-neʼe akontese.