CII man Davidi kpe kera yô, a pase Solomon mbaawashima mba Aôndo sha u maan tempel u Yehova. Ken inyom i sha unyiin i hemen na la, Solomon hii u maan tempel, man tôô anyom ataankarahar man tiôn u been un. Iorov udubu pue pue er tom sha tempel la, man imaagh kila ki tôô inyaregh kpishi kpishi je. Kwagh ne ka nahan sha ci u i er tom sha zenaria kua azurfa kpishi sha u maan un.

Tempel la lu a ukpar keregh mba vesen uhar, di vough e̱r tabernakel la kpaa yange lu a mi nahan. Kpa ukpar mban ve kehe hemba mba ken tabernakel mbara kwa har je. Solomon na i ver areki u ikuryan ken kpar u ken atô u tempel la, man akaa a genegh a yange i ver ken tabernakel la yô i ver a ken kpar ugen la.

Er í maa tempel la i kure yô, i e̱r zege iniongo. Solomon gure hen ishigh ki tempel la e̱r msen, er u nenge ken foto ne nahan. ‘Sha jimin cii kpaa a kuma u lun ijiir you ga,’ Solomon kaa a Yehova nahan, ‘man hile di, tempel u m maa ne, ve una kuma u lun ijiir you yee. Kpa, tere Aôndo wam, wea lumun yô ungwa kwaghôron u ior ou shighe u vea er msen hen ijiir ne yô.’

Er Solomon kur msen na la yô, usu sen sha. Ú hia nagh ku nanden ku iniaav mbi sôngon mbi ve na la cii. Shi iwanger due hen Yehova iv ken tempel. Kwagh ne tese je er Yehova ngu ungwan, man shi saan un iyol sha m-maa u tempel la kua msen u Solomon la kpaa. Ka tempel la hingir ijiir i ior vea za sha u civir ye, kera lu hen tabernakel ga.

Shighe kar kpishi ken hemen u Solomon hemen sha kwaghfan yô, man saan ior iyol kpaa. Kpa Solomon e̱r kasev kpishi ken ityar i genegh mba ve lu mba civir Yehova ga yô. Ú nenge e̱r ugen a lu civir hen ishigh ki eev mbula kpa? Ken masejime yô kasev nav na Solomon kpa hingir u civir mbaaôndo mbagenev. Ú fa kwagh u a e̱r shighe u Solomon er kwagh ne la kpa? A kera eren a ior sha inja ga. A vihi tu tsung, nahan kera saan ior iyol ga.

Kwagh ne na ishima vihi Yehova a Solomon, nahan a kaa a na er: ‘Me ngohol tartor hen awe kera man me na orgenegh. Me e̱r kwagh ne sha shighe wou ga, kpa a lu sha shighe u hemen u wan wou. Kpa me ngohol ior mban cica cii hen wan wou kera ga.’ De se nenge e̱r kwagh ne e̱r yô.