64-нҗи хекая

Сүлейман ыбадатхана гуряр

ХУДАЙ ыбадатхананың чызгысыны Давуда берипди. Давут оны өлүминиң өң янында оглы Сүлеймана берйәр. Сүлейман хөкүмдарлыгының дөрдүнҗи йылында ыбадатхананы гурмага башлап, оны еди ярым йылда гутаряр. Бу гурлушыга он мүңлерче адамлар гатнашып, көп пул гидйәр. Чүнки гурлушыкда көп алтын-күмүш уланыляр.

Чадыр ялы ыбадатхана хем ики саны эсасы отагдан ыбаратды. Эмма бу отаглар чадырың отагларындан ики эссе улуды. Сүлейман ички отагда әхт сандыгыны гойяр, бейлеки отагда болса чадырдакы галан затлары гойяр.

Ыбадатхана гурлуп гутаранда улы байрамчылык боляр. Суратда ыбадатхананың өңүнде Сүлейманың дыза чөкүп дога эдип дуршуна серет. Ол Ехова: «Сени хатда гөклерем сыгдырып биленок, бу ыбадатхана болса саңа хас-да кичидир. Эй Худайым, халкың ыбадатхана бакып, саңа эден хер бир догасыны эшитмегиңи хайыш эдйәрин» дийип дога эдйәр.

Сүлейман догасыны гутаран бадына гөкден от инип, гурбан эдилен хайванлары кабул эдйәр. Шонда ыбадатхана Ехованың нурундан доляр. Бу болса Ехованың Сүлейманың догасыны эшидендигини ве онуң гуран ыбадатханасындан хем-де догасындан хошалдыгыны гөркезйәр. Инди халк сежде этмәге чадыра дәл-де, ыбадатхана баряр.

Сүлейман бирнәче йыллап акылдарлык билен хөкүмдарлык эдйәр, шонуң үчинем халк багтлы яшаярды. Соңра Сүлейман кесеки юртлардан Ехова сежде этмейән көп аяла өйленйәр. Оларың бириниң бута сежде эдйәнини гөрйәңми? Ахыры Сүлейман хем аяллары билен ялан таңрылара сежде эдйәр. Шондан соң нәме боланыны билйәңми? Сүлейман инди говы хөкүмдар дәлди. Ол залымды, халк болса бетбагтды.

Ехова Сүлеймана гахарланып: «Патышалыгы сенден алып башга адама берерин. Мен муны сениң өмрүңде дәл, сениң оглуң хөкүмдарлыгында эдерин. Йөне оглуң элиндәки патышалыгы тутушлыгына алмарын» диййәр. Гел, мунуң ерине етишини билели.

1 Тарыхлар 28:9—21; 29:1—9; 3 Патышалар 5:1—18; 2 Тарыхлар 6:12—42; 7:1—5; 3 Патышалар 11:9—13.