Makani 64: Solomoni Wayaka Tempele
KATANAFWA Davida, wakamupa Solomoni malailile aakazwa kuli Leza aambuli mbwaakeelede kuyaka tempele lya Jehova. Mumwaka wane wakulela, Solomoni watalika kuyaka tempele, alimwi yamutolela myaka iili ciloba acisela. Zyuulu-zyuulu zyabantu balabeleka kuyaka tempele, alimwi kwabelesyegwa mali manji kapati. Eeci cili boobo akaambo kakuti kwabelesyegwa kapati ngolida ansiliva.
Tempele ilijisi maanda obilo mapati, kuli yamujulu ayaansi mbuli bwakabede cikombelo. Pele aaya maanda, mapati ziindi zyobilo kwiinda yaayo amucikombelo. Solomoni wabweza bbokesi lyacizuminano akulibikka muŋanda yacikombelo, alimwi azimwi zintu zyakali kuyobodwa mucikombelo zyabikkwa muŋanda iimwi.
Niyamana tempele, kwacitwa pobwe lipati. Solomoni wafwugama kumpela lya tempele wapaila mbuli mbobona acifwanikiso. Solomoni wati kuli Jehova: ‘Noliba Julu ndiniini cakuti tokonzyi kukkwana mulindilyo. Elo nkuceya tempele eeli! Pele O Leza wangu, koswiilila bantu bako nobakomba abusena obuno.’
Solomoni mbwaamanina kupaila, kwaboola mulilo kuzwa kujulu. Waumpa banyama boonse babikkwa acituuzyo. Alimwi mumuni uumwekesya uuzwa kuli Jehova watubya mutempele yoonse. Eeci citondezya kuti Jehova ulaswiilila alimwi akuti waikkomanina tempele amupailo wa Solomoni. Itempele kuleka cikombelo, bwaba mbobusena bantu nkobaboola kuzyi kukomba.
Kwaciindi cilamfwu Solomoni ulalela munzila yabusongo, aboobo bantu balikkomenyi. Pele Solomoni wakwata bamakaintu banji bazwa mumasi aambi batakombi Jehova. Hena wamubona umwi nkwakomba cibumbwa? Limwi bamakaintu bakwe bapa kuti Solomoni awalo atalikke kukomba baleza bambi. Hena ulicizyi cacitika Solomoni naacita boobu? Waleka kubafwida luzyalo bantu. Waba silunya, aboobo bantu tabacikkomani kabili.
Eeci capa kuti Jehova amukalalile Solomoni, alimwi wati kuli nguwe: ‘Ndiya kukunyanga bwami bwako akubupa muntu uumbi. Tandikaciciti eeci kocipona, pele mumazuba aakulela kwamwana wako. Pele tandikamunyangi mwana wako bantu boonse bamubwami bwako.’ Atubone mbocacitika eeci.
1 Makani 28:9-21; 29:1-9; 1 Bami 5:1-18; 2 Makani 6:12-42; 7:1-5; 1 Bami 11:9-13.
Mibuzyo
- Ino cakamutolela ciindi cilamfwu buti Solomoni kuyaka tempele lya Jehova, alimwi nkaambo nzi ncokwakabelesyegwa mali manji?
- Ino tempele lyakajisi maanda ongaye, alimwi ncinzi cibikkidwe mulingayo?
- Ncinzi Solomoni ncaamba mumupailo wakwe nilyamana tempele?
- Mbuti Jehova mbwaatondezya kuti wakkomana amupailo wa Solomoni?
- Ncinzi bamakaintu ba Solomoni ncobamupa kuti acite, alimwi ncinzi cacitika kuli Solomoni?
- Nkaambo nzi Jehova ncaamukalalila Solomoni, alimwi ncinzi Jehova ncaamwaambila?
Mibuzyo aimwi
- Bala 1 Makani 28:9, 10.
Kweelana amajwi aa Davida aalembedwe ku 1 Makani 28:9, 10, ncinzi ncotweelede kusoleka canguzu kucita mubuumi bwesu? (Int. 19:14; Flp. 4:8, 9)
- Bala 2 Makani 6:12-21, 32-42.
Mbuti Solomoni mbwaakatondezya kuti taku ŋanda iiyakwa amuntu njakonzya kukkwana Leza Mupatikampatila? (2 Mak. 6:18; Inc. 17:24, 25)
Mbuti majwi aa Solomoni aajanwa ku 2 Makani 6:32, 33 mbwaatondezya kuti alamujatikizya Jehova? (Inc. 10:34, 35; Gal. 2:6)
- Bala 2 Makani 7:1-5.
Mbweena mbuli bana Isilayeli mbocakabapa kutembaula Jehova nibakabona bulemu bakwe, ino mbuti andiswe sunu mbotweelede kulimvwa twayeeya zilongezyo zya Jehova kubantu bakwe? (2 Mak. 7:3; Int. 22:22; 34:1; 96:2)
- Bala 1 Bami 11:9-13.
Mbuti buumi bwa Solomoni mbwaakapona mbobutondezya mbociyandika kuzumanana kusyomeka kusikila kumamanino? (1 Bam. 11:4, 9; Mt. 10:22; Ciy. 2:10)
