BʼAJTANTO yuj oj chamuk, ja David yaʼ yi ja Salomón ja jastal oj kʼulaxuk ja stemplo ja Jyobaji. Ja bʼa xchanil xa jabʼil wan yajel ja smandari, Salomón och ya kʼeʼuk ja templo sok yiʼaj yuj juke jabʼil sok snalan ja chʼak kʼeʼuki. Mas ja 180,000 winike aʼtiye ja bʼa yajel kʼeʼuk ja templo. Yiʼajni aʼtela sok jitsan takʼin, yujni jel yamxi oro sok plata.

Jastal ni bʼa tabernáculo, ja templo it ayiʼoj chabʼ kwarto jel tʼilan. Kechan yuj ja it chabʼ ekʼele mas niwan yuja tabernáculo. Salomón skʼulan ja kopre bʼa trato aʼajuk bʼa kwarto mas chʼikan ochi.

Yajni chʼak tojbʼuk ja templo, skʼulane jun niwan kʼin. Jastal waxa wila bʼa dibujo, ja Salomón koʼ mekʼan bʼa stiʼ ja templo sok yaʼ yi orasyon ja Jyoba: «Anke jel niwan ja satkʼinali mini malanuk abʼaja, ¡jaʼukto maʼ ja templo it! Pe aʼawa pabor kala Dyos, maklay ja orasyon oj yawe yi jawa chonabʼ ja bʼa templo it».

Yajni ja Salomón chʼak skʼuluk ja yorasyon, koʼ kʼakʼ bʼa satkʼinal. Chʼak tsikuk ja chanteʼik kʼapubʼal jastal majtanali, sok jun ijlabʼ bʼa Jyoba sbʼutʼu ja templo. Ja it wa sjeʼa ja yeʼn wani smaklajel ja yorasyon ja Salomón, lekni yabʼa sok gustoʼay yuja templo. Ja weʼgo ja templo jaxa ni ja lugar bʼa oj yaʼteltaye ja Dyos ja israʼelenyoʼiki, mixa ti bʼa tabernáculo.

Jitsani tyempo, ja Salomón jelni snaʼa yajel mandaranel, sok ja chonabʼi jelni lek ajyi ja sakʼanile. Pe ja Salomón yiʼajni jitsan ixuk bʼa tuktukil chonabʼ mi xyaʼteltaye ja Dyos smeranili. ¿Wan maʼ xbʼobʼ awil june ja bʼa yeʼnle wan skʼapjel yi majtanal ja skʼulubʼal dyosi? Takal takal ja xcheʼumiki yawe jitsuk-el bʼa stsʼeʼel ja Jyoba sok skʼumbʼese yi ja skʼujoli bʼa oj yaʼteltay kʼulubʼal dyos. Anto, ¿wan maʼ xa naʼa ja jasa kʼe ekʼuki? Salomón ixta xa wa xyila ja ixuk winiki sok mixa syajtay. Ja chonabʼi mixa gusto ajyi ja sakʼanile.

Jyoba tajki sok ja Salomón sok yala yabʼ: «Ojni japawi jawa chol jastal mandaranum sok pilan ma oj kayi. Mi oj jkʼuluk bʼa wa sakʼanil, oj kʼuluk bʼa smandaranel ja wa wunini. Pe mi oj jap yi yibʼanal». La kiltik jastal waj ja it.