AKXNI David nina aʼxniy maxkilh Salomón tatsokgni niku xtatsokgnit la Jehová xlakaskin natlawakan xtemplo. Akxni xliʼakgtati kata akxni xmapakgsinama Salomón tsukulh tlaway templo, chu akgtujun kata aitat litlawakgolh. Lhuwa xaʼakgkaw mil lakchixkuwin tsukukgolh skujkgoy anta ktama lanka chiki, chu lu taparaxla kitaxtulh, xlakata lu lhuwa oro chu plata litlawaka.

Uma templo kgalhi pulaktiy tlakg xalaklanka chuna la xwi tabernáculo. Pero umakgolh pulaktiy xlakata, tlakg lanka nixawa xla tabernáculo. Salomón tlaway pi caja xla talakkaxlan kawilika alakatanu kpulaktu tlakg xaʼaktsu, chu amakgapitsi tuku na anta xtanumakgolh ktabernáculo kawilikan xʼapulaktu tlakg xalanka.

Akxni tlawakgoka templo litlawaka lanka fiesta. Chu Salomón tatsokgostalh kxlakatin templo chuna la wix akxilhpat, chu wan kxʼoración: Nipara kʼakgapun lay akchaniyan anta natawilaya xlakata mi lilanka, ¿la na akchaniyan uma templo? KiDios, kakakgalhakgaxpatti minkachikin akxni unu naminkgoy tlawakgoy xʼoraciónkan.

Akxni Salomón tlawakgolh xʼoración, mokgosli lhkuyat kʼakgapun. Chu lhkuyulh animales nema xkamakamastamaka. Chu xmakgxkgakganat Jehová litatsamalh templo. Uma limasiyalh pi Jehová kgalhakgaxmatma xʼoración, chu lu lipaxuwalh templo nema tlawalh Salomón. Chu kachikin unu ktemplo minkgoy kakninankgoy Jehová chu nialh ktabernáculo.

Lhuwa kata Salomón lu tlan mapakgsinalh, chu kristianos lu paxuwakgoy. Pero Salomón katatamakgaxtokgli lhuwa lakpuskatin xalak alakatanu kachikinin wa nema ni kakninanikgoy Jehová. ¿Akxilhpat kdibujo chatum xpuskat kakninanima xdios? Alistalh xlakpuskatin matlawikgolh pi Salomón na katsukulh kakninaniy amakgapitsi dioses. ¿Katsiya tuku tsukulh lay? Salomón lu lixkajni tsukulh likatsiy, chu kachikin nialh paxuwakgoy.

Uma tuku tlawalh Salomón, Jehová lu lisitsinilh, chu waniy: Nakmakglhtiyan tamapakgsin chu atanu tiku nakmaxkiy. Ni kmilatamat naktlaway uma tuku kwaniman, chuna naktlaway akxni minkgawasa namapakgsinan. Pero ni putum ktimakglhtilh kristianos nema namapakgsiy minkgawasa. Naʼakxilhaw la chuna lalh uma.