DAVIDE apo wakaŵa wandafwe, wakapeleka kwa Solomoni pulani ya kazengero ka tempele kufuma kwa Ciuta. Mu cilimika cacinayi ca ufumu wake, Solomoni wakayamba kuzenga tempele, ndipo likatora vilimika vinkhondi na viŵiri pacanya myezi sikisi kuti limare kuzengeka. Ŵanalume ŵanandi ŵakagwiranga nchito ya kuzenga tempele, ndipo kuzenga kukatora ndarama zinandi comene. Ici nchifukwa cakuti ŵakagwiliskiranga nchito golide na siliva linandi pakuzenga tempele.

Tempele likaŵa na vipinda vikuru viŵiri, nga umo cikaŵira cihema. Kweni vipinda ivi vikaŵa vikuru kuluska kaŵiri vipinda vya cihema. Solomoni wakaŵika likasa la phangano mu cipinda ca mukati ca tempele, ndipo vinthu vinyake ivyo vikaŵa mu cihema wakaviŵika mu cipinda cinyake.

Tempele lati lamara, ŵakacita ciphikiro cikuru. Solomoni wakajikama panthazi pa tempele na kulomba, nga ni umo ukuwonera pa cithuzithuzi apa. Solomoni wakati kwa Yehova kuti: ‘Nanga ni mlengalenga ungamukwanani yayi, sono uli pakuyowoya za tempele ilo nazenga, kasi lingamukwanani wuli? Kweni, naŵeya Ciuta wane, pulikani lurombo lwa ŵanthu ŵinu para ŵakulomba kulazga ku malo ghano.’

Solomoni wakati wamara kulomba, moto ukakhira kufuma kucanya. Ukawocha sembe yose iyo wakanozga. Ndipo ungweru ukuru wa Yehova ukazuzga tempele. Ici cikaŵa cilongolero cakuti Yehova wakapulika, ndiposo wakakondwa na tempele na lurombo lwa Solomoni. Tempele ndigho ghakaŵa malo ghakuti ŵanthu ŵasopelengemo m’malo mwa cihema.

Solomoni wakawusa mwavinjeru kwa nyengo yitali, ndipo ŵanthu ŵakakondwanga. Kweni Solomoni wakatora ŵanakazi ŵanandi ŵa vyaru vinyake awo ŵakasopanga Yehova yayi. Kasi ukuwona yumoza wa iwo wakusopa cikozgo? Paumaliro ŵawoli ŵake ŵakamupangiska kusopa ŵaciuta ŵanyake. Kasi ukumanya ico cikacitika apo Solomoni wakayamba kucita ntheura? Wakaleka kucitira ŵanthu lusungu. Wakamba kuŵacitira nkhaza, ndipo ŵanthu ŵakakondwa nga mphakwamba yayi.

Ici cikapangiska Yehova kukwiyira Solomoni, ndipo wakamuphalira kuti: ‘Nikupokenge ufumu na kuwupeleka kwa munthu munyake. Nicitenge ici mu mazuŵa ghako cara, kweni mu mazuŵa gha mwana wako. Ndipouli, kuti nipokenge ufumu wose cara kufuma ku mwana wako.’ Tiye tiwone umo ici cikacitikira.