ДАВИ́Д өлүрүнүң бетинде Бургандан алган Иегованың өргээзиниң шыйыгларын Соломо́нга дамчыдып берген. Соломо́н башкарылгазының дөрткү чылында өргээни тудуп эгелээш, чеди чартык чыл болгаш тудуп дооскан. Тудугга он-он муң кижилер киришкен болгаш ону тударынга аажок хөй акша чарыгдаттынган. Чүге дээрге тудугга хөй алдын болгаш мөңгүн ажыглаттынган.

Бурганның өргээзи, чадыр-биле дөмей, ийи кол өрээлден тургустунган. Ынчалза-даа олар чадырның өрээлдеринден ийи катап улуг бооп турар. Дөрүнде өрээлче Соломо́н дугуржулга-чагыг хааржаан салып каан, а ийиги өрээлче ооң мурнунда чадырга шыгжаттынып турган өске эт-херекселдерни салып каан.

Өргээни тудуп доосканы дээш, дыка улуг байырлал эртирериниң дугайында чарлал үнген. Чурукче көрем: Соломо́н өргээниң мурнунга дискээнге туруп алгаш мөргүп турар. ‘Бүгү дээр безин сени сыңырып шыдавас болганда,— деп, Соломо́н Иеговага чугаалаан,— бо өргээ сеңээ кайы-хире бичии деп. Ынчалза-даа, Бурганым, сээң чонуң бо черже угландыр мөргүүр болза, ону дыңнап көрем’.

Соломо́н мөргүлдү төндүрүптерге, дээрден от дүшкен. Ол өргүлге белеткеп каан дириг-амытаннарны ажырыпкан. Бурганның өргээзи Иеговадан чайынналчак чырык-биле дола берген. Ол чүүл Иегованың мөргүлдү дыңнаанын, ол ышкаш өргээзинге болгаш Соломо́ннуң мөргүлүнге таарзынганын көргүзүп турар. Ам чон чүдүүрү-биле чадырже эвес, а Бурганның өргээзинче барып турар.

Соломо́н хөй чылдар дургузунда мерген угаанныг башкарып турар боорга, чон аас-кежиктиг. Ынчалза-даа соонда Соломо́н Иеговага чүдүвес өске чурттарның хөй-ле херээженнерин кадай кылдыр ап алган. Оларның бирээзи дүрзү-бурганга канчаар чүдүп турарын, көрүп тур сен бе? Сөөлүнде кээп ол херээженнер Соломо́нну дүрзү-бурганнарга чүдүүрүнче көгүдүпкеннер. Ооң соонда чүү болганыл, билир сен бе? Соломо́н багай башкарыкчы апарган. Ол каржы апарган, ынчангаш ам чон аас-кежик чок.

Иегова Соломо́нче хорадап, аңаа чарлап турар: ‘Мен сенден күрүнени хунаап алгаш, ону өске кижиге бериптер мен. Мен ону сээң назының иштинде кылбас мен, а сээң оглуң башкарып турар үеде кылыр мен. Ынчалза-даа мен сээң оглуңнуң күрүнезинде шупту кижилерни хунаавас мен’. Ол канчаар болурул, билип алыылам.

1 Паралипоменон 28:9—21; 29:1—9; 3 Царств 5:1—18; 2 Паралипоменон 6:12—42; 7:1—5; 3 Царств 11:9—13.