Esapulo 64: Salomone wa Tunga Onembele
OSIMBU handi Daviti ka file, wa ecele ku Salomone oloseteko vioku tunga onembele ya Yehova. Salomone kunyamo wa kuãla wuviali waye, wa fetika oku tunga onembele. Poku yi tunga yambata eci ci soka anyamo epanduvali lolosãi epandu. Kua talavaya olohulukãi viomanu kuenda kua pesekavo olombongo vialua. Momo va talavaya lopalata kuenda ulu.
Onembele yaco ya kuatavo olohondo vivali vinene ndeci ca kala otavernakulu. Pole, olohondo viaco via kala vali vinene okuti olohondo vina viotavernakulu vi sule. Salomone wa tuma oku kapa ocikasia covisila vohondo yi kasi vokati konembele. Ovina vikuavo viovo tavernakulu, wa vi kapa vohondo yikuavo.
Eci onembele ya pua oku tungiwa, kua lingiwa ocipito cimue cinene. Ndomo o cilete vociluvialuvia cilo, Salomone wa kekama kovaso yonembele oku likutilila ku Yehova. Eye wa popia ku Yehova hati: ‘Vilu lovilu liovailu ku suimo. Onembele nda kutungila ndeti ku suimo. Haimo a Suku yange, yevelela kolohutililo viomanu vove eci ovo va likutililila kocitumãlo cilo.’
Eci Salomone a mala oku likutilila, kilu kua tunda ondalu. Ondalu yaco ya lia ovilumba viovinyama vina via kala kutala. Kuenje ocinyi ca tunda ku Yehova ca tuila onembele. Ovina viaco via lekisa okuti Yehova wa yeva ohutililo. Kuenda eye wa sanjukila onembele lohutililo ya Salomone. Onembele yaco ya litepele calua lotavernakulu. Momo ya kala ocitumãlo cimue okuti omanu vosi va pondola oku fendelamo.
Salomone wa viala va Isareli lolondunge vokuenda kuotembo yalua. Kuenje omanu va kuatele esanju lialua. Pole Salomone weya oku kuela akãi vokolofeka vikuavo vana ka va fendela Yehova. Kũlĩhisa ndomo umue pokati kavo a kasi loku fendela ociñumañuma. Noke Salomone akãi vaye vo vetiyavo oku fendela olosuku viñi. Ove hẽ wa kũlĩha eci ca pita omo liovilinga viaco via Salomone? Vokuenda kuotembo Salomone wa fetika oku tata lãvi omanu. Eye weya oku kala ondingaĩvi kuenje omanu ka va kuatele vali esanju.
Ovilinga viaco vieya oku wengula onyeño ya Yehova kuenje wa temela Salomone. Eye wo sapuila hati: ‘Ndupa usoma kokuove kuenje ndi weca komunu ukuavo. Pole si ci lingi koloneke viove. Ndi ci linga koloneke viusoma womõlove. Kuviali womõlove, omanu vosi ndi va nyeha peka liaye.’ Tu konomuisi ndomo ceya oku pita.
1 Asapulo 28:9-21; 29:1-9; 1 Olosoma 5:1-18; 2 Asapulo 6:12-42; 7:1-5; 1 Olosoma 11:9-13.
Apulilo
- Salomone wa pita anyamo añami oku tunga onembele ya Yehova? Kuenda momo lie ca pesilile olombongo vialua?
- Onembele ya kala lolohondo viñami? Kuenda nye va enda oku kapa vokati kohondo ya sulako?
- Nye Salomone a popia vohutililo yaye eci onembele ya pua oku tungiwa?
- Nye Yehova a linga ca lekisa okuti wa sanjukilile ohutililo ya Salomone?
- Nye akãi va Salomone vo vetiyile oku linga? Kuenda nye ceya oku pita la Salomone?
- Momo lie Yehova a temẽlele la Salomone? Kuenda nye Yehova o sapuila?
Apulilo akuavo
- Tanga 1 Asapulo 28:9, 10.
Ndomo ca lekisiwa volondaka via Daviti via sonehiwa kelivulu lia 1 Asapulo 28:9, 10 nye tu sukila oku likolisilako oku linga komuenyo wetu weteke leteke? (Osa. 19:14; Va Fil. 4:8, 9)
- Tanga 2 Asapulo 6:12-21, 32-42.
Salomone wa lekisa ndati okuti Suku Tõlo ka kala vonjo ya tungiwa lomanu? (2 Asa. 6:18; Ovil. 17:24, 25)
Olondaka via Salomone vi sangiwa kelivulu lia 2 Asapulo 6:32, 33 vi lekisa nye catiamẽla ku Yehova? (Ovil. 10:34, 35; Va Gal. 2:6)
- Tanga 2 Asapulo 7:1-5.
Ndeci va Isareli va vetiyiwile oku sivaya Yehova lovisungo, ci tu vetiyavo oku linga nye koloneke vilo eci tu mola asumũlũho a Yehova komanu vaye? (2 Asa. 7:3; Osa. 22:22; 34:1; 96:2)
- Tanga 1 Olosoma 11:9-13.
Ulandu womuenyo wa Salomone u lekisa ndati esilivilo lioku amamako lekolelo toke kesulilo? (1 Olos. 11:4, 9; Mat. 10:22; Esit. 2:10)
