Nganea 64: Salomo u Fhaṱa Thembele
Davida a sa athu u fa, o fha Salomo dzipulane dzi bvaho ha Mudzimu dza u fhaṱa thembele ya Yehova. Ṅwahani wa vhuṋa wa u vhusa hawe, Salomo a thoma u fhaṱa thembele, nahone zwa dzhia miṅwaha ya sumbe na hafu u i fhedza. Ha shuma mahumi a zwigidi zwa vhanna kha thembele, nahone tshifhaṱo tsha ḓura tshelede nnzhi ngauri ha shumiswa musuku munzhi na tsimbitseṱha khayo.
Thembele yo vha i na kamara mbili khulwane, u fana na denndeni ya mulanga. Fhedzi idzi kamara dzo vha dzi tshi fhira dza denndeni luvhili nga vhuhulwane. Salomo a ita uri mbulungelo i vhewe kamarani ya thembele, na zwiṅwe zwithu zwe zwa vha zwi tshi vhewa denndeni ya mulanga zwa vhewa kha iṅwe kamara.
Musi thembele yo fhela, ha vha na tshimima tshihulu. Salomo a gwadama phanḓa ha thembele a rabela, samusi ni tshi nga mu vhona tshifanyisoni. Salomo a ri kha Yehova: ‘Ḽiṱaḓulu ḽoṱhe a u fheleli kha ḽo, u nga fhelela hani-ha kha iyi thembele. Fhedzi, Mudzimu wanga, thetshelesa vhathu vhau vha tshi rabela vho sedza fhethu afha.’
Musi Salomo a tshi fhedza thabelo yawe, ha tsa mulilo u tshi bva ṱaḓulu. Wa fhisa zwiṱhavhelo zwa zwipuka zwe zwa vha zwo itwa. Tshedza tshi penyaho tsha Yehova tsha ḓadza thembele. Zwo sumbedza uri Yehova o vha a tshi khou thetshelesa, na uri o takadzwa nga thembele na thabelo ya Salomo. Nṱhani ha dennde ya mulanga, thembele ya vha he vhathu vha ḓa u rabela hone.
Tshifhinga tshilapfu Salomo a vhusa nga nḓila ya u thanya, na vhathu vho vha vho takala. Fhedzi Salomo a vhinga vhasadzi vhanzhi vha maṅwe mashango vha sa rabeli Yehova. Ni a mu vhona muṅwe wavho a tshi khou rabela tshifanyiso? Vhasadzi vhawe vha vhuya vha mu ita uri na ene a rabele miṅwe midzimu. Salomo a tshi ita izwi o vha a sa tsha fara vhathu zwavhuḓi. O vha na tshiṱuhu, na vhathu vha si tsha takala.
Izwi zwa ita uri Yehova a sinyutshele Salomo, a mu vhudze: ‘Ndi ḓo u dzhiela muvhuso nda u fha muṅwe munna. A thi nga zwi iti u kha ḓi tshila, fhedzi vhukati ha muvhuso wa murwa wau. Fhedzi thi nga dzhieli murwa wau vhathu vhoṱhe vha muvhuso.’ Kha ri vhone uri izwi zwo itea hani.
1 Koronika 28:9-21; 29:1-9; 1 Dzikhosi 5:1-18; 2 Koronika 6:12-42; 7:1-5; 1 Dzikhosi 11:9-13.
Mbudziso
- Salomo o fhedza tshifhinga tshingafhani musi a tshi khou fhaṱa thembele ya Yehova, nahone ndi ngani i tshi ḓura vhukuma?
- Hu na kamara nngana henefho thembeleni, nahone ho vhewa mini kamarani ya thembele?
- Salomo o ri mini kha thabelo yawe musi thembele yo no fhela?
- Yehova o sumbedza hani uri o takadzwa nga thabelo ya Salomo?
- Vhafumakadzi vha Salomo vho mu kunga uri a ite mini, nahone ho itea mini nga Salomo?
- Ndi ngani Yehova o sinyutshela Salomo, nahone Yehova o ri mini khae?
Mbudziso dzo engedzeaho
- Vhalani 1 Koronika 28:9, 10.
Nga ṅwambo wa maipfi a Davida o ṅwalwaho kha 1 Koronika 28:9, 10, ri fanela u lwela u ita mini vhutshiloni hashu ha ḓuvha ḽiṅwe na ḽiṅwe? (Ps. 19:14; Vha-Fil. 4:8, 9)
- Vhalani 2 Koronika 6:12-21, 32-42.
Salomo o sumbedza hani uri Mudzimu wa Ṱaḓulu-ṱaḓulu ha dzuli kha tshifhaṱo tsho fhaṱwaho nga muthu? (2 Koron. 6:18; Mish. 17:24, 25)
Maipfi a Salomo a re kha 2 Koronika 6:32 a sumbedza mini nga ha Yehova? (Mish. 10:34, 35; Vha-Gal. 2:6)
- Vhalani 2 Koronika 7:1-5.
Samusi Vhaisiraele vho ṱuṱuwedzwa uri vha rende Yehova musi vha tshi vhona vhugala hawe, ṋamusi ndi ngani ri tshi fanela u kwamea musi ri tshi humbula nga ha nḓila ye Yehova a fhaṱutshedza ngayo vhathu vhawe? (2 Koron. 7:3; Ps. 22:22; 34:1; 96:2)
- Vhalani 1 Dzikhosi 11:9-13.
Buḓo ḽe Salomo a ḽi dzhia vhutshiloni ḽi sumbedza hani ndeme ya u dzula ri tshi fulufhedzea u swika vhufheloni? (1 Dzikh. 11:4, 9; Mat. 10:22; Ndzumb. 2:10)
