Tantara 64

Solomona Niasa Tempoly

DAVIDA talohan’izy naty, nan̈ambara Solomona raha jiaby nirahin’ny Zan̈ahary atao, amy fan̈amboaran̈a tempolin’i Jehovah. Solomona nanampôno niasa tempoly io tamy fahefatra taon̈o nanjakany. Fito taon̈o sy tapany tempoly io vo vita. Maro olo niasa tempoly io, maro koa vola lany tamy zio, fôtony volamena ndreky volafotsy niasan̈a ankamaraozan’ny raha tao.

Nisy efitry aroe maventy tempoly io, karaha amy tabernakely in̈y. Tsy mampiran̈a izy fo, habezan’ny efitry aroe io indroen’ny efitry aby tamy tabernakely in̈y. Fiaran’ny fanekena in̈y napetraka Solomona tan̈atin’ny efitry tamy tempoly tao, baka iô raha jiaby nakajin̈a tamy tabernakely in̈y nataony tamy efitry hafa.

Koa fa vita tempoly io, irô nan̈ano fety naresaka. Hitanao amy sary io Solomona mivavaka. Volan̈iny tamy Jehovah: ‘Ndray lan̈itry maventy be io fo tsy tandry anao, intsaka eky tempoly ty. Kanefa, Tômpoko anao, tandrin̈esa fo vavaka ataon’olonao, izikoa irô fa mitodiky amy tempoly ty.’

Koa fa vita vavaka Solomona, nisy môtro latsaka boaka tan-dan̈itry, nan̈ôro biby natao sôron̈o tao. Nisy hazavan̈a boaka tamy Jehovah amy zay tamy tempoly tao. Zen̈y mivolan̈a fa Jehovah nankasitraka raha natao tao, sady ravoravo tamy nivitan’ny tempoly io, ndreky vavaka Solomona in̈y. Tamy tempoly tao amy zay olo nan̈ano fanompoan̈a fa tsy tamy tabernakely eky.

Tan̈atin’ny taon̈o maro, Solomona ampanjaka nahay nitaondra, ke olo jiaby ravoravo. Solomona fo nanambady man̈angy maro boaka amy tany hafa. Irô io tsy manompo Jehovah. Hitanao araiky manompo sampy io? Tamy farany Solomona voataon̈on-drô hanompo zan̈ahary tsy izy. Hainao raha nahazo Solomona koa fa nan̈ano zen̈y? Izy tsy tsara fan̈ahy tamin’olo eky. Izy nanjary kafiry, ke olo tsy faly taminany.

Jehovah neloko tamy Solomona. Nambarany: ‘Hadosoko aminao fanjakan̈a, hamiako olo hafa. Kanefa tsy lera anao mbala velon̈o iziô han̈anaovako zen̈y, fa lera zanakanao manjaka. Ndray izy man̈ano zen̈y, tsy olo jiaby tsy ho tia zanakanao.’ Nisy marin̈y ma raha zen̈y? Alô zahavatsika.

1 Tantara 28:9-21; 29:1-9; 1 Mpanjaka 5:15-32; 2 Tantara 6:12-42; 7:1-5; 1 Mpanjaka 11:9-13.