DAUDI mkanawe, ŵamsalile Solomoni kataŵe ka nyumba ja Yehofa mwakamulana ni yaŵasasile Mlungu. Mu caka camcece ca ulamusi wakwe, Solomoni akutanda kutaŵa nyumba jakulambilila, soni ŵamalisisye kutaŵa nyumbaji pali papite yaka 7 ni hafu. Masawusande gamajinji ga ŵandu gakukamula masengo gakutaŵa nyumba jakulambililaji, soni masengo gakutaŵaga gakulya mbiya syapawinji. Masengoga gakulya mbiya syapawinji ligongo lyakuti golidi ni silifa jwamjinji akumkamulicisya masengo pakutaŵapo.

Nyumba jakulambililaji jikwete yipinda yiŵili yekulungwa, mpela muyaŵelele mu tenti jakulambilila. Nambo yipindayi yili yekulungwa kupunda kaŵili ukulu wa yipinda ya mu tenti jakulambilila jila. Solomoni akuŵikamo libokosi lya cilangano mkati mwa nyumba jakulambilila, soni yindu yine yaŵayisungaga mu tenti jakulambilila jila akuyiŵika mu cipinda cine.

Nyumba ja Mlungu pajimasile kutaŵa, pakutendekwa cindimba cekulungwa. Solomoni akutindiŵala kusogolo kwa nyumbaji nikupopela, mpela mwakuti kuyiwona paciwililipa. Jwalakwe akupopela kwa Yehofa acitiji: ‘Atamose kwinani kosope kwene ngakomboleka wawojo kwakwanako, nambi kuli wuli nyumba jajinandi jakulambililaji, ŵalakwe ngaŵa mkukwanamo. O Mlungu jwangu, conde ŵapikanile ŵandu ŵawo pakupopela kwa ŵalakwe pamalo agano.’

Solomoni pamalisisye kupopela, moto ukugwa kutyocela kwinani, ni ukutinisya mbopesi syosope sya nyama syalingenye ŵandu. Soni kuŵala kwakutyocela kwa Yehofa kukugumbala m’nyumba jakulambililajo. Yeleyi yikulosya kuti Yehofa akupikanila, soni kuti jwalakwe akusangalala ni nyumbaji, nambosoni lipopelo lya Solomoni. Sambano mmalo mwa tenti jakulambilila Mlungu, nyumbaji jikuŵa malo gakwisa ŵandu kukulambilila.

Kwa ndaŵi jelewu Solomoni akulamulila mwalunda, soni ŵandu ali ŵakusangalala. Nambo Solomoni akulombela acakongwe ŵajinji ŵangalambila Yehofa ŵakutyocela m’yilambo yine. Ana akum’wona jumo jwa acakongweŵa jwakulambila mtembejo? Pambesi pakwe acakongweŵa akumtendekasya kuti nombe najo alambileje mitembe. Ana akumanyilila yayikutendekwa patesile yeleyi? Jwalakwe ngakwatendelasoni ŵandu canasa. Akuŵa jwangalwe, soni ŵandu ngakusangalala atapanandi.

Yeleyi yikumtendekasya Yehofa kumtumbilila Solomoni, ni akumsalila kuti: ‘Cinjimsumula ucimwene wenu ni kupeleka kwa mundu jwine. Nambo ngasindenda yeleyi pandaŵi jenu, nambo pandaŵi jacacilamulilaga mwanagwenu. Soni ngasinatyosya ŵandu wosope mu ucimwene wa mwanagwenu.’ Kwende tulole muyatendecele yeleyi.