ARAM mo daw kun ta’no ta pigpaparaknit kan lalaking ini an bado niya? Iyan kaya an sabi saiya ni Jehova. An lalaki iyo si Ahias na propeta nin Diyos. Aram mo kun ano an propeta? Saiya sinasabi nin Diyos an mga bagay na mangyayari pa sana.

An kaulay digdi ni Ahias iyo si Jeroboam. Siya an pigpamahala ni Solomon sa trabahong pagtugdok. Kan masabat ni Ahias si Jeroboam sa tinampo, may pambihirang ginibo si Ahias. Hinuba niya an sulot niyang bagong bado asin pinarakit iyan sa 12 pidaso. Sinabi niya ki Jeroboam: ‘Kuanon mo ining sampulong pidaso.’ Aram mo kun ta’no ta tinawan ni Ahias si Jeroboam nin sampulong pidaso?

Ipinaliwanag ni Ahias na kukuanon ni Jehova ki Solomon an kahadian. Sinabi niya na itatao ni Jehova ki Jeroboam an sampulong tribo. Kaya duwang tribo na sana an matatada sa aki ni Solomon na si Rehoboam para pamahalaan kaini.

Kan mabaretaan ni Solomon an sinabi ni Ahias ki Jeroboam, angguton siya. Hininguwa niyang gadanon si Jeroboam, pero nagdulag ini pa-Ehipto. Paghaloy-haloy, nagadan si Solomon. Naghadi siya nin 40 taon, asin sinalidahan siya ni Rehoboam. Sa Ehipto, naisihan ni Jeroboam na gadan na si Solomon, kaya nagbalik siya sa Israel.

Bakong maray na hadi si Rehoboam. Mas maisog pa ngani siya sa saiyang ama na si Solomon. Si Jeroboam asin an iba pang midbid na mga lalaki nagduman ki Hading Rehoboam asin nakiulay na magin mabuot ini sa banwaan. Pero dai nagdangog an hadi. Imbes, lalo pa siyang nagin maisog. Kaya si Jeroboam an ginibong hadi kan mga tawo sa sampulong tribo, alagad padagos na pinaghadian ni Rehoboam an duwang tribo, an Benjamin asin Juda.

Habo ni Jeroboam na nagduduman sa Jerusalem an mga sakop niya tanganing magsamba sa templo ni Jehova. Kaya naggibo siya nin duwang bulawan na ugbon na baka asin inengganyar an mga tawo sa sampulong tribong kahadian na sambahon iyan. Dai nahaloy, naglakop an krimen asin kadahasan.

May kariribukan man sa duwang tribong kahadian. Mayo pang limang taon na hadi si Rehoboam kan salakayon kan hadi nin Ehipto an Jerusalem. Kinua kan hadi nin Ehipto an dakul na kayamanan sa templo ni Jehova. Kaya sa dikit lang na panahon, nabago an dating kamugtakan kan templo.