Stori 65: Kingdom i Seraot
?YU SAVE from wanem man ya long pija ya i stap teterem klos blong hem? Jeova i talem long hem blong mekem olsemia. Man ya, hem i wan profet blong God we nem blong hem Ahia. ?Yu yu save wanem ya wan profet? Wan profet hem i wan man we God i talemaot long hem samting we bambae i hapen.
Long pija ya, Ahia i stap toktok long Jeroboam.Solomon i putumap Jeroboam i kam bos long sam wok blong bildim haos blong God. Taem Ahia i mitim Jeroboam long rod, Ahia i mekem wan narakaen samting. Hem i tekemaot niufala kot blong hem, mo i terem long 12 pis. Nao hem i talem long Jeoroboam se: ‘Yu tekem 10 pis klos ya i blong yu.’ ?Yu save from wanem Ahia i givim 10 pis klos ya long Jeroboam?
Ahia i talem se Jeova bambae i tekemaot raet blong Solomon blong rul. Hem i talem se Jeova bambae i letem Jeroboam i rul long 10 laen blong Isrel. Hemia i min se tu laen nomo bambae i stap blong Rehoboam we i pikinini blong Solomon bambae i rul long tufala.
Taem Solomon i harem tok we Ahia i talem long Jeroboam, hem i kam kros tumas, nao hem i traem blong kilim Jeroboam i ded. Be Jeroboam i girap, i ronwe i go long Ijip. Smoltaem i pas nao Solomon i ded. Hem i bin rul blong 40 yia, nao pikinini blong hem Rehoboam i kam king. Long Ijip, Jeroboam i harem nius ya se Solomon i ded finis, ale hem i girap i kambak long Isrel.
Rehoboam i no wan gudfala king. Hem i strong moa i winim papa blong hem Solomon. Jeroboam mo sam narafala haeman oli go luk King Rehoboam blong askem long hem blong mekem i gud moa long ol man. Be Rehoboam i no wantem lesin. Hem i mekem i strong moa long olgeta. Nao ol man oli girap oli mekem Jeroboam i kam king blong 10 laen, mo Rehoboam i gohed blong rul long tufala laen blong Benjamin mo Juda.
Jeroboam i no wantem we ol man blong hem oli go long Jerusalem blong mekem wosip long haos blong Jeova. Ale hem i wokem tu smol buluk long gol mo i talem long ol 10 laen blong Isrel blong oli bodaon long tufala buluk ya. I no longtaem, kantri ya i kam fulap long ol nogud fasin mo fasin blong kilim man.
I gat trabol i kamaot tu long tufala laen we Rehoboam i rul long tufala. Rehoboam i no rul faef yia yet, be king blong Ijip i kam mekem faet agens long Jerusalem. Hem i karemaot plante sas samting long haos blong Jeova mo i tekem olgeta oli gobak long Ijip. Taswe, yumi luk se haos blong Jeova i stapgud blong smoltaem nomo afta we oli wokem.
1 King 11:26-43; 12:1-33; 14:21-31.
Ol Kwestin
- ?Wanem nem blong tufala man long pija ya? ?Tufala ya i hu?
- ?Ahia i mekem wanem long klos blong hem? ?Wanem mining blong samting ya?
- ?Solomon i traem mekem wanem long Jeroboam?
- ?From wanem ol man oli mekem Jeroboam i kam king blong ten laen blong Isrel?
- ?From wanem Jeroboam i wokem tu smol buluk long gol? ?Smoltaem biaen wanem i hapen long kantri ya?
- ?Wanem i hapen long tufala laen ya mo haos blong Jeova long Jerusalem?
Sam narafala kwestin
- Ridim 1 King 11:26-43.
?Jeroboam i wanem kaen man? ?Jeova i promes blong mekem wanem sipos Jeroboam i obei long ol loa blong Hem? (1 King 11:28, 38)
- Ridim 1 King 12:1-33.
?Nogud fasin blong Rehoboam i save tijim ol papa mama mo ol elda long wanem samting long saed blong fasin blong kam bigfala bos long narafala? (1 King 12:13; Pri. 7:7, NW; 1 Pita 5:2, 3)
?Tede ol yangfala oli mas go luk hu blong oli givhan long olgeta blong mekem ol bigfala disisen long laef blong olgeta? (1 King 12:6, 7; Prov. 1:8, 9; 2 Tim. 3:16, 17; Hib. 13:7)
?Wanem i pusum Jeroboam blong wokem wan buluk long gol long tufala ples? ?Olsem wanem samting ya i soem se hem i no gat bilif long Jeova? (1 King 11:37; 12:26-28)
?Hu i lidim ol ten laen blong Isrel blong oli girap agensem trufala wosip? (1 King 12:32, 33)
