Maana 65nan

Masaya tilala

YALA i b’a dɔn mun na nin cɛ bɛ ka a ka duloki fara-fara ka kɛ kunkurun caman ye wa? Jehova de y’a fɔ a ye ko a k’a kɛ. Nin cɛ ye Ala ka kira dɔ de ye. A tɔgɔ ye ko Akija. I b’a dɔn kira ye mɔgɔ min ye wa? Kira ye mɔgɔ ye, Ala bɛ sini kow fɔ min ye.

 Akija bɛ ka kuma Jeroboam fɛ yan yɔrɔ la. Jeroboam ye mɔgɔ ye, Solomani tun ye min bila a ka sojɔbaara dɔw kunna. Akija ye Jeroboam kunbɛn sira kan tuma min na, Akija ye ko dɔ kɛ min bɛ mɔgɔ kabakoya. Duloki kura min tun b’a kan na, a ye o fara-fara kunkurun 12 ye. A y’a fɔ Jeroboam ye ko: ‘kunkurun 10 ta.’ I b’a dɔn mun na Akija ye kunkurun 10 di Jeroboam ma wa?

Akija y’a fɔ a ye ko Jehova bɛna masaya bɔsi Solomani na, ka kabila 10 di Jeroboam ma. O kɔrɔ ye ko kabila fila dɔrɔn de bɛna to Solomani denkɛ Roboam bolo, a bɛna mara kɛ minnu kunna.

Akija ye min fɔ Jeroboam ye, Solomani ye o mɛn tuma min na, a diminna kosɛbɛ. A y’a ɲini ka Jeroboam faga. Nka, Jeroboam bolila ka taa Misira. Waati dɔ tɛmɛna, Solomani sara. A ye san 40 kɛ masaya la. A denkɛ Roboam kɛra masakɛ ye sisan. Jeroboam ye o mɛn tuma min na, a seginna ka na Israɛl.

Roboam tun tɛ masakɛ ɲuman ye. A tun ka jugu mɔgɔw ma ka tɛmɛ a fa Solomani kan. Jeroboam ni mɔgɔba wɛrɛw taara masakɛ Roboam fɛ k’a fɔ a ye, ko a ka mɔgɔw minɛ ka ɲɛ. Nka, Roboam ma sɔn k’u lamɛn. A juguyara mɔgɔw ma kosɛbɛ ka tɛmɛ fɔlɔ kan. O la sa, mɔgɔw ye Jeroboam kɛ masakɛ ye kabila 10 kunna. Roboam tora masaya la kabila fila tɔw kunna. O kabila fila tun ye Benjamɛn ni Juda ye.

Jeroboam tun t’a fɛ a ka mɔgɔw ka taa Jerusalɛm, ka Jehova bato alabatosoba la. O la sa, a ye misiden sanulama fila dilan, k’a fɔ kabila 10 mɔgɔw ye ko u ka o misidenw bato. A ma mɛn, a ka jamana bɛɛ fara juguya ni farinya la.

Kabila fila tɔw fana ye tɔɔrɔ sɔrɔ. Roboam kɛra masakɛ ye tuma min na, a ma san duuru yɛrɛ bɔ, Misira masakɛ nana Jerusalɛm kɛlɛ. Nafolo minnu tun bɛ Jehova batosoba kɔnɔ, a ye o caman ta ka taa ni u ye. Alabatosoba tun bɛ cogo min na a jɔtuma na, a ma to o cogo la ka mɛn.

1 Masakɛw 11:​26-43; 12:​1-33; 14:​21-31.