Abahüdaguni 65

Lafanreinragun arúeihani

SUBUDITI san bun ka lan uagu laheiridaguñoun lubéi wügüri le daüguaü to? Heowá ariñagubei lun lun ladügüni katei le. Wügüri le Aíasi lani Bungiu profeta. Subuditi san bun katei lan profetabei? Aban gürigia le unti lariñagei Bungiu kaba lan asusereda lubaragiñe dan.

Ladimurehaña Aíasi luma Heroboamü, ligía aban wügüri le unbei lariñaga Salomón ladügün lídangiñe wadagimanu lánina ábunaguni. Dan le ladunragunbei Aíasi luma Heroboamü ǘmadarugu aba ladügün aban katei ámuti. Aba laragachunu iseri idáü to luaguboun aba laheiridagunu lidan 12 murusun. Ábati lariñagun lun Heroboamü: ‘Barüba diisi murusun bánime.’ Subuditi san bun ka lan uagu líchigei diisi murusun lun?

Aba lafuranguagüdüni Aíasi luagu lagidaraali lan Heowá arúeihani luéi Salomón. Ariñagati líchiga lan Bungiu diisi türibu lun Heroboamü. Le mini lubéi le biamarügübei lan türibu ígiruti lun larúeihani Roboamü le liráü Salomón.

Aba lagañidun Salomón dan le laganbuni le lariñagubei Aíasi lun Heroboamü, aba louchun láfaruni hilagubei, ábati lanurun Heroboamü Ehiptun. Lárigiñe aba lounwen Salomón. Arúeihati Salomón luagu 40 irumu, guentoti Roboamü le liráü urúeibei. Aba laganbuni Heroboamü Ehiptun luagu hilá lan Salomón, ábati lagiribudun Ísüraeli.

Mama aban urúei buiti Roboamü. Furundetimati hama gürigia luéi meha Salomón le lúguchi. Aba lidin Heroboamü hama amu wügüriña wéirigutiña adimureha luma Roboamü, ábati hamuriahan luma lun lóuseruniña gürigia buidu. Ani maganbun lumutiñu, darí lun furundetimahali lan. Ligíati híchugunbalin gürigia Heroboamü urúeime hawagu diisi türibu, ánheinti biama türibu le lani Hudá luma Benhamín Roboamü harúeitebei.

Mabusenrunti Heroboamü houdin gürigia Herusalén áhuduragua tidan litenpulun Heowá. Ligíati ladügünbei bián bágasu lautiñu golu lun háhuduragun gürigia ha lánina arúeihani lani diisi türibu houn. Lau lufurese aba labuinchun ageiraü lau wuribani luma anarimeni.

Anihein giñe turóbuli lidan larúeihan biama türibu. Moustarungili seingü irumu lárigiñe larúeihan Roboamü, aba liabin lurúeite Ehiptu ageindagua kóntüra Herusalén. Barüti saragu irisini tídangiñe litenpulun Heowá. Ítara liña merede tan ténpulu kei meha furumiñe.

1 Urúeigu 11:26-43; 12:1-33; 14:21-31.