NTE ỌMỌFIỌK ntak owo emi awaide ọfọn̄idem esie mbak mbak? Jehovah ọkọdọhọ enye anam oro. Owo emi edi A·hiʹjah, prọfet Abasi. Nte ọmọfiọk se prọfet edide? Enye edi owo oro Abasi asiande se iditịbede ke mbemiso.

Mi, A·hiʹjah etịn̄ ikọ ọnọ Jer·o·boʹam. Jer·o·boʹam edi owo emi Solomon onịmde ndinam ndusụk utom ubọp ufọk esie. Ke A·hiʹjah osobode Jer·o·boʹam mi ke usụn̄, A·hiʹjah anam esen n̄kpọ. Enye osio obufa ewura emi enye esịnede awak ke mbak duopeba. Enye ọdọhọ Jer·o·boʹam: ‘Da mbak duop ke idem fo.’ Nte afo ọmọfiọk ntak A·hiʹjah ọnọde Jer·o·boʹam mbak 10?

A·hiʹjah anam an̄wan̄a ete Jehovah ọmọn̄ ọbọ Solomon obio ubọn̄. Enye ete Jehovah eyenọ Jer·o·boʹam esien 10. Emi ọwọrọ ete ke esien iba kpọt ẹdisụhọ ọnọ Re·ho·boʹam eyen Solomon ndikara.

Ke Solomon okopde se A·hiʹjah ọdọhọde Jer·o·boʹam, enye ayat esịt etieti. Enye odomo ndiwot Jer·o·boʹam. Edi Jer·o·boʹam efehe aka Egypt. Ekem, Solomon akpa. Enye ekedi edidem ke isua 40, edi ke emi ẹnam Re·ho·boʹam eyen esie edidem. Ko ke Egypt, Jer·o·boʹam okop ete Solomon akpa, ntre enye afiak ke Israel.

Re·ho·boʹam idighe eti edidem. Enye akam ọdiọk ye mme owo akan nte ete esie Solomon ọkọdiọkde. Jer·o·boʹam ye ndusụk akpan owo ẹtiene Edidem Re·ho·boʹam eben̄e enye ọfọn akan ye mme owo. Edi Re·ho·boʹam ikpan̄ke utọn̄. Ke akpanikọ, enye akabade ọdiọk akan mbemiso. Ntre, mbon obio ẹnam Jer·o·boʹam edidem ndikara esien 10, edi mme esien iba eke Benjamin ye Judah ẹnịm Re·ho·boʹam nte edidem mmọ.

Jer·o·boʹam iyomke ikọt esie ẹka Jerusalem ẹketuak ibuot ke temple Jehovah. Ntre enye anam nditọ enan̄ gold iba onyụn̄ anam mbon obio ubọn̄ esien duop ẹtuak ibuot ẹnọ mmọ. Ibịghike, isọn̄ ọyọhọ ye ubiat ibet ye obom.

Afanikọn̄ odu n̄ko ke obio ubọn̄ esien iba. Isịmke isua ition nte Re·ho·boʹam akakabade edidem, edidem Egypt edi ndin̄wana ye Jerusalem. Enye ada uwak n̄kpọ uto ke temple Jehovah ọnyọn̄. Ntre edi ke ibio ini kpọt ke temple etie ukem nte ini ẹkebọpde.