Ouhona mau haṋewa
EHUNGI 65
Ouhona mau haṋewa
OVE mo tjiwa kutja omena ratjike omurumendu ngwi tji ma taura ombanda ye yokombanda moutupa? Jehova we mu raera kutja nga tjite nao. Omurumendu ngwi omuprofete waMukuru Ahija. Ove mo tjiwa kutja omuprofete omundu ngu tjita tjike? Eye omundu Mukuru ke raera oviṋa komurungu woruveze mbi mavi katjitwa.
Ahija imba ma hungire kuna Jerobeam. Jerobeam omurumendu ngwa zikwa i Salomo okumutyera oviungura vye tjiva vyokutunga. Indu Ahija tja hakaena na Jerobeam imba mondjira, Ahija wa tjita otjiṋa otjihimise. Eye wa hukura ombanda yokombanda ndja hwikikire ne i taura moutupa 12. Eye wa raera Jerobeam: ‘Toora outupa 10 u rire owoye.’ Ove mo tjiwa kutja omena ratjike Ahija tja yandja outupa 10 ku Jerobeam?
Ahija wa kahurura kutja Jehova ma kayeka Salomo ouhona. Eye we mu raera kutja Jehova ma kayandja omihoko 10 ku Jerobeam. Ihi matji heye kutja omihoko vivari uriri ombi mavi sewa po komuzandu waSalomo Rehabeam okuvihonaparera.
Indu Salomo tja zuva imbi Ahija mbya raera Jerobeam, eye wa pindika tjinene. Eye wa kondjisa okuzepa Jerobeam. Nungwari Jerobeam wa taurira koEngipte. Kombunda yokaruveze okasupi Salomo wa ṱa. Eye wa honapara otja ombara oure wozombura 40, nungwari nambano omuzandu we Rehabeam ongwa rira ombara. Ngunda a ri moEngipte Jerobeam wa zuva kutja Salomo wa ṱu, okutja eye wa kotoka ku Israel.
Rehabeam ka ri ombara osemba. Eye aa tumbu otjiwaṋa mongaro ombi tjinene okukapita omuano ihe Salomo mbwee ve tumbu. Jerobeam na tjiva vovarumendu varwe ovatengwa va ya kombara Rehabeam nave mu ningire kutja ma tjinde otjiwaṋa nawa. Nungwari Rehabeam kena pa puratena ku wo. Nu tjiri, we ve tumbira ko navi kombanda yanao. Mena ranao otjiwaṋa tja toorora Jerobeam ma rire ombara kombanda yomihoko 10, nungwari omihoko vivari vyaBenjamin na Juda vya panḓera pu Rehabeam otja ombara yawo.
Jerobeam kaa vanga kutja otjiwaṋa tji yende ku Jerusalem okukerikotamena kondembeli yaJehova. Okutja eye wa ungura ozondana mbari zongoldo nu wa tjita kutja otjiwaṋa tjomohoko 10 tji rikotamene kuzo. Tjimanga ehi re urire novitjitwa vyotjitandi noutwe.
Mouhona womihoko vivari wina mwa ri noumba. Ombara yaEngipte ye ya okurwisa Jerusalem, kombunda yozombura ine indu Rehabeam tja za nokurira ombara. Oyo ya toora ovihuze ovingi okuza mondembeli yaJehova. Okutja ondembeli ya kara okaruveze okasupi uriri tjimuna indu tji ya ri indu tji ya tungwa.
