Ngewa ya 65: Kũtilĩkana kwa Ũsumbĩ
WE NĨWĨSĨ mũndũ ũũ etembũanga ngũa yake ilungu nĩkĩ? Yeova nĩwe wamwĩĩte nĩeke ũu. Mũndũ ũũ nĩ Aiya mwathani wa Ngai. We nĩwĩsĩ mwathani nũũ? Nĩ mũndũ ũla Ngai ũtavasya mbee maũndũ ala makekĩka.
Aiya aĩ vaa aineena na Yelovoamu. Yelovoamu nĩwe mũndũ ũla Solomoni watw’ĩte mũnene wa wĩa wa kwakĩthya ĩmwe ya myako yake. Aiya akomanĩie na Yelovoamu vaa nzĩanĩ nake eeka ũndũ wa ũsengy’a. Aiya aumisye ngũa yake nzaũ ĩla weekĩĩte na amĩtembũanga ilungu 12. Na amwĩa Yelovoamu: ‘Ĩyosee ilungu 10.’ We nĩwĩsĩ Aiya amũnengie Yelovoamu ilungu 10 nĩkĩ?
Aiya amwĩie kana Yeova nũkũmũvena Solomoni ũsumbĩ naimũnenga Yelovoamu mbaĩ 10. Ũu woonanasy’a kana Leovoamu mwana wa Solomoni akasumbĩka o mbaĩ ilĩ.
Yĩla Solomoni weewie ũndũ Aiya wĩie Yelovoamu, athata mũno. Na atata kũaa Yelovoamu. Ĩndĩ Yelovoamu asemba akĩĩa Misili. Ĩtina wa ĩvinda ĩvũthũ Solomoni akw’a. Asumbĩkie myaka 40. Na ĩtina wa kũkw’a, mwana wake Leovoamu atwikĩthw’a mũsumbĩ. Yelovoamu e Misili nĩweew’ie Solomoni nĩ mũkw’ũ, kwoou asyoka Isilaeli.
Leovoamu ndaĩ mũsumbĩ mũseo. Nĩwamathĩnisye andũ mũno kũthonoka ũndũ ĩthe wake wamathĩnĩtye. Na ĩndĩ Yelovoamu na aũme angĩ me nguma mathi kwa Mũsumbĩ Leovoamu na mamũvoya ekae andũ nesanga. Ĩndĩ Leovoamu ndaamethukĩĩsya. Nake aendeea na kũthũka. Kwoou andũ matw’ĩkĩthya Yelovoamu mũsumbĩ ĩũlũ wa mbaĩ 10, ĩndĩ mbaĩ ilĩ, ya Mbenyamini na Yuta, syaendeea kũsumbĩkwa nĩ Leovoamu.
Yelovoamu ndendaa andũ make maendae Yelusaleme kũthaithĩa ĩkalũnĩ ya Yeova. Kwoou aseũvya tũsaũ twĩlĩ twa thaavu na eea andũ ma ũsumbĩ ũsu wa mbaĩ 10 matũthaithae. Na ĩtina wa ĩvinda ĩkuvĩ nthĩ yausũwa nĩ ũtũli wa mĩao na ũng’endu.
O naw’o ũsumbĩ ũla wa mbaĩ ilĩ waĩ o na mathĩna. Myaka ĩtano ĩtanamba kũthela, ĩtina wa Leovoamu kũtwika mũsumbĩ, mũsumbĩ wa Misili nĩwookie kũkita na andũ ma Yelusaleme. Nĩwakuie syĩndũ mbingĩ sya vata kuma ĩkalũnĩ ya Yeova. Kwoou no kwa ĩvinda ĩkuvi ĩkalũ yaendeeie kwĩthĩwa yĩilyĩ ũndũ yailyĩ ĩla yaakiwe.
1 Asumbĩ 11:26-43; 12:1-33; 14:21-31.
Makũlyo
- Aũme aa me vaa visanĩ metawa ata, namo naaũ?
- Aiya eĩkana ata na ngũa yake, na yĩko yĩu yĩonany’a ata?
- Solomoni atatie kwĩkana na Yelovoamu ata?
- Nĩkĩ andũ mamũtwie Yelovoamu mũsumbĩ ĩũlũ wa mbaĩ ĩkũmi?
- Nĩkĩ Yelovoamu waseũvisye tũsaũ twĩlĩ twa thaavu, na nthĩ yakwatiwe nĩ kyaũ ĩvinda ĩkuvĩ ĩtina wa ũndũ ũsu?
- Kweethĩiwe ata ĩũlũ wa ũsumbĩ ũla wa mbaĩ ilĩ na ĩkalũ ya Yeova ndũanĩ ya Yelusaleme?
Makũlyo ma kwongeleela
- Soma 1 Asumbĩ 11:26-43.
Yelovoamu aĩ mũndũ wa mũthemba mwaũ, na Yeova amwathie kyaũ kethĩwa akakwata mĩao ya Ngai? (1 Asu. 11:28, 38)
- Soma 1 Asumbĩ 12:1-33.
Kumana na ngelekany’o nthũku ya Leovoamu, asyai na atumĩa ma kĩkundi matonya kwĩmanyĩsya kyaũ ĩũlũ wa kũtũmĩa ũkũmũ naĩ? (1 Asu. 12:13; Mũta. 7:7; 1 Vet. 5:2, 3)
Andũ ma mũika ũmũnthĩ matonya kũthi kwaũ nĩ kana makwate ũtao mũseo ĩũlũ wa kwĩka motwi maito nthĩnĩ wa thayũ woo? (1 Asu. 12:6, 7; Nth. 1:8, 9; 2 Tim. 3:16, 17; Aevl. 13:7)
Nĩ kyaũ kyatumie Yelovoamu ambĩlĩĩlya kũndũ kwĩlĩ kwa kũthaithĩa tũsaũ, na ũndũ ũsu woonanisye ata kana ndamũĩkĩĩe Yeova? (1 Asu. 11:37; 12:26-28)
Nũũ ũla watongoeisye andũ ma ũsumbĩ ũla wa mbaĩ ĩkũmi maleane na ũthaithi wa w’o? (1 Asu. 12:32, 33)
