ПЩІЭРЭ мы цІыхухъум и халатыр Іыхьэ–Іыхьэу щІичатхъэр? Апхуэдэу ищІыну жызыІар Иеговэщ. Мыр Алыхьым и бегъымбар Ахиещ. ПщІэрэ бегъымбарыр хэтми? Ар къэхъун хуейр къэмыхъу щІыкІэ Алыхьым къызыхузэІуих цІыхуращ.

Иджыпсту Ахие зэпсалъэ цІыхухъум зэреджэр Иеровоамщ. Сэлмэн Иеровоам игъэуващ ухуакІуэ лэжьыгъэ гуэрхэр зэрекІуэкІым кІэлъыплъыну. Ахие Иеровоам гъуэгум щыхуэзауэ гъэщІэгъуэн гуэр щрегъэлъагъу. И халатыщІэр зыщехри Іыхьэ 12 ечатхъэ. ИтІанэ Иеровоам жреІэ: «Къащтэ ІыхьипщІыр». ПщІэрэ Ахие ІыхьипщІыр Иеровоам щІритыр?

Ахие Иеровоам къыгурегъаІуэ Сэлмэн пащтыхьыгъуэр къытрихыжу лъэпкъипщІыр Иеговэ абы иритыну зэригугъэр. Сэлмэн и къуэ Ровоам зи унафэ ищІыну къыхуэнэжынур лъэпкъитІыращ.

Ар Сэлмэн къызэрищІэу къогубжьри Иеровоам иукІыну яужь йохьэ. Ауэ Иеровоам Мысырым щІопхъуэж. Зэмэн куэд дэмыкІыу Сэлмэн малІэ. Илъэс 40–кІэ ар пащтыхьу щытащ, иджы абы и пІэкІэ пащтыхь мэхъу и къуэ Ровоам. Сэлмэн зэрылІар Иеровоам къищІа нэужь, Израилым къегъэзэж.

Ровоам пщы Іейщ. И адэ Сэлмэн цІыхухэм зэрахущытам нэхърэ нэхъ Іейжу ар яхущытщ. Иеровоамрэ нэгъуэщІ цІэрыІуэ цІыху зыбжанэрэ Ровоам деж къокІуэри йолъэІу цІыхухэм нэхъыфІыІуэу яхущытыну. Ауэ Ровоам абыхэм едаІуэкъым икІи япэм нэхърэ ІэджэкІэ нэхъ Іеижу цІыхухэм яхущытын щІедзэ. Абы щхьэкІэ цІыхухэм лъэпкъипщІым и пащтыхьу Иеровоам хах, адрей лъэпкъитІыр, Вениаминрэ Иудэрэ я лъэпкъыр, Равоам къыхуонэ.

Иеровоам хуейкъым абы и цІыхухэр Иерусалим кІуэурэ Иеговэ и унэшхуэм щІыхь щыхуащІынуи, абы дыщэм къыхэщІыкІауэ танитІ ещІри лъэпкъипщІым щыщ цІыхухэр хегъэзыхь ахэр ягъэлъэпІэну. Куэд дэмыкІыу а хэкур щІигъанэу мэхъу щІэпхъаджагъэмрэ залымыгъэмрэ.

ЛъэпкъитІ хъу пащтыхьыгъуэми насыпыншагъэ куэд къыщохъу. Ровоам пащтыхьыгъуэр зэриубыдрэ илъэситхуи дэкІатэкъым, Иерусэлим Мысырыр къыщытеуам. Абыхэм хъугъуэфІыгъуэ куэд къыщІах Иеговэ и унэшхуэм. Арати, унэшхуэр зэрыщытам хуэдэу куэдрэ щытыжкъым.