MA NAKAANAW kʼaʼut naq li winq aʼin yook xpejbʼal li raqʼ? Li Jehobʼa kitaqlank re li winq chi xbʼaanunkil aʼin. Li winq aʼin aj Ahiya ut nakʼanjelak chiru li Yos. Ma nakaanaw kʼaru xkʼanjel laj Ahiya chiru li Jehobʼa? Li Jehobʼa kixye re laj Ahiya kʼaru tkʼulmanq saʼ li kutan chaalel.

Laj Ahiya yook chi aatinak rikʼin laj Jeroboan. Laj Jeroboan kikʼeheʼk xwankil naq kikʼanjelak rikʼin laj Salomon. Naq laj Ahiya kixtaw laj Jeroboan saʼ bʼe kirisi li raqʼ chirix ut kixpeji saʼ 12 jachal. Tojaʼ naq laj Ahiya kixye: ‹Kʼam 10 jachal ru li tʼikr›. Kʼaʼut naq kixsi re laj Jeroboan 10 jachal ru li tʼikr aʼin?

Laj Ahiya kixye re laj Jeroboan naq li Jehobʼa tixmaqʼ li awabʼejilal chiru laj Salomon ut tixkʼe re aʼan 10 chi teep re naq tixjolomi. Joʼkan naq kaʼajwiʼ wiibʼ chi teep tixjolomi laj Rehoboam, ralal laj Salomon.

Kʼajoʼ naq kichalk xjosqʼil laj Salomon naq kirabʼi li kixye laj Ahiya re laj Jeroboan. Joʼkan naq kiraj xkamsinkil laj Jeroboan, abʼan laj Jeroboan xko Egipto. Laj Salomon kiʼawabʼejink chiru 40 chihabʼ. Naq kikamk laj Salomon, li ralal kikanaak choʼq awabʼej ut laj Jeroboan kiʼelk chaq Egipto ut kisutqʼiik saʼ li tenamit Israel.

Laj Rehoboam moko us ta kiʼawabʼejink, xbʼaan naq maaʼus xnaʼlebʼ rikʼin li tenamit. Kixqʼax ru xmaaʼusilal chiru li kixbʼaanu laj Salomon. Joʼkan naq laj Jeroboan ut ebʼ li winq li wankebʼ xwankil saʼ Israel, kohebʼ xyeebʼal re naq tixjal xnaʼlebʼ rikʼin li tenamit. Laj Rehoboam inkʼaʼ kirabʼihebʼ ut kinumtaak li xmaaʼusilal. Joʼkan naq ebʼ laj Israel keʼxkʼe laj Jeroboan chi xjolominkil li 10 chi teep. Abʼan laj Rehoboam kikanaak rikʼin xteep laj Benjamin ut laj Juda.

Laj Jeroboan inkʼaʼ kiraj naq ebʼ 10 chi teep teʼxik Jerusalen chi xloqʼoninkil li Jehobʼa. Joʼkan naq kixyiibʼ wiibʼ li pechʼbʼil yos re oor, re naq aʼan chik teʼxloqʼoni ru. Chirix chik aʼan kinumtaak li maaʼusilal ut li rahilal saʼ li tenamit.

Wank ajwiʼ chʼaʼajkilal saʼ li xteep laj Benjamin ut saʼ li xteep laj Juda. Toj maajiʼ naxbʼaanu oobʼ chihabʼ laj Rehoboam saʼ li xʼawabʼejilal, naq li awabʼej re Egipto kichalk chi yalok saʼ xbʼeen li tenamit Jerusalen. Li awabʼej re Egipto kirelqʼa naabʼal li kʼaʼaq re ru saʼ Rochoch li Jehobʼa. Joʼkan naq li Rochoch li Jehobʼa moko najt ta kiwank joʼ naq keʼxyiibʼ chaq saʼ xtiklajik.