NĨ ŨŨĨ kĩrĩa kĩratũma mũndũ ũyũ atembũrange nguo yake icunjĩ nyingĩ? Nĩ Jehova wamwĩrire eeke ũguo. Mũndũ ũyũ Ahija, nĩ mũnabii wa Ngai. We-rĩ, nĩ ũũĩ mũnabii nũũ? Nĩ mũndũ ũrĩa Ngai amenyithagia maũndũ mbere ya gwĩkĩka.

Haha Ahija araria na Jeroboamu. Jeroboamu nĩ mũndũ ũrĩa Suleimani aigĩte arũgamĩrĩre mwako wake. Hĩndĩ ĩrĩa Ahija macemanirie na Jeroboamu njĩra-inĩ-rĩ, Ahija nĩekire kĩũndũ kĩa magegania. Eyaũrire nguo yake njerũ ya mũtumano na akĩmĩtembũranga icunjĩ 12. Eerire Jeroboamu ũũ: ‘Wĩyoere icunjĩ ikũmi.’ We-rĩ, nĩ ũũĩ kĩrĩa gĩatũmire Ahija ahe Jeroboamu icunjĩ 10?

Ahija aamũtarĩirie ũrĩa Jehova ekweheria ũthamaki kuuma kwĩ Suleimani. Oigire atĩ Jehova nĩekũhe Jeroboamu mĩhĩrĩga 10. Ũũ nĩ kuuga atĩ no mĩhĩrĩga ĩrĩ tu yatigirũo yathwo nĩ Rehoboamu mũriũ wa Suleimani.

Rĩrĩa Suleimani aiguire ũrĩa Ahija eerire Jeroboamu, akĩrakara mũno. Akĩgeria kũũraga Jeroboamu. No ĩndĩ Jeroboamu agĩtharĩra Misiri. Thutha wa kahinda kanini Suleimani agĩkua. Aathamakire mĩaka 40, no rĩu mũrũwe Rehoboamu agĩtuo mũthamaki. Jeroboamu e kũũrĩa Misiri, agĩkĩigua atĩ Suleimani nĩakuĩte, na nĩ ũndũ ũcio akĩhũndũka Isiraeli.

Rehoboamu ti mũthamaki mwega. O na aarĩ mwĩĩ harĩ andũ gũkĩra ithe Suleimani. Jeroboamu o hamwe na andũ me igweta magĩthiĩ he Mũthamaki Rehoboamu na makĩmũũria ekĩre andũ wegega. No ĩndĩ Rehoboamu ndaigana gũthikĩrĩria. Ũhoro wa ma nĩ atĩ, aatuĩkire mwĩĩ gũkĩra mbere ĩyo. Kwoguo andũ rĩu magĩtua Jeroboamu mũthamaki wa mĩhĩrĩga 10, no ĩndĩ mĩhĩrĩga ĩrĩ ya Benjamini na Juda magĩtua Rehoboamu ta mũthamaki wao.

Nake Jeroboamu ndendire andũ ake mathiage Jerusalemu gũthathaiya Jehova hekarũ-inĩ yake. Agĩgĩthondeka njaũ igĩrĩ cia thahabu na agĩtũma andũ a mĩhĩrĩga ĩyo 10 macithathayagie. O narua bũrũri ũkĩiyũrũo nĩ uuni watho na ũũru.

O na ningĩ kwarĩ na thĩna thĩinĩ wa ũthamaki wa mĩhĩrĩga ĩrĩa ĩrĩ. Ihinda rĩnyihĩire mĩaka ĩtano thutha wa Rehoboamu gũtuĩka mũthamaki-rĩ, mũthamaki wa Misiri agĩũka kũhũũra Jerusalemu. Nĩakuire indo nyingĩ cia goro kuuma hekarũ-inĩ ya Jehova. Kwoguo kwarĩ o kahinda kanini tu hekarũ ĩkĩhaana ta ũrĩa yatariĩ mbere.