NALUNNGILIUK suna pillugu angutip uuma qallersaatini aggoraa? Jehovap taamaalioqqummani. Tassaavoq Guutip pruffiitia Ahija. Pruffiiti suusoq nalunngiliuk? Inuuvoq Guutip pisussanik siumut oqaluttuuttagaa.

Uani Ahijap Jeroboam oqaluuppaa. Salomonip Jeroboam sanaartortitami ilaannut nakkutilliisunngortissimavaa. Jeroboam aqqusinermi naapikkamiuk Ahija eqqumiitsumik iliorpoq. Qallersaatitaani peerpaa aqqaneq-marlunngorlugulu aggorlugu. Jeroboam oqarfigaa: ’Aggorneri qulit tigukkit.’ Nalunngiliuk suna pillugu Ahijap Jeroboam aggornernik qulinik tunigaa?

Ahijap nassuiaappaa Jehovap Salomon naalagaaffimmik arsaarumaaraa. Oqarpoq Jehovap naggueqatigiit qulit Jeroboamimut tunniukkumaarai. Tassa naggueqatigiit marluinnaat amiakkuussapput Salomonip ernerata Rehabeamip naalagaaffigisassai.

Ahijap Jeroboamimut oqaluttuaa tusaramiuk Salomon kamattorsuanngorpoq. Jeroboam toqunniaraluarpaa. Jeroboamili Egyptenimut qimaavoq. Kinguningaatsiaagut Salomon toquvoq. Ukiut 40-t kunngiuvoq, maannalu ernera Rehabeam kunnginngorpoq. Egyptenimiilluni Jeroboamip tusarpaa Salomon toqusoq, taamaattumik Israelimut uterpoq.

Rehabeam kunngiunngilaq pitsaasoq. Ataataminit Salomonimit allaat naakkittaanneruvoq. Jeroboam angutillu nuimasut allat kunngimut Rehabeamimukarput qinnuigalugu inunnut naakkittarneroqqullugu. Rehabeamilli tusaajumanngilaq. Sulili naakkittaannerulerpoq. Taamaattumik inuit Jeroboam naggueqatigiinnut qulinut kunnginngortippaat. Naggueqatigiilli Benjaminikkut Judakkullu Rehabeam kunngigiinnarpaat.

Jeroboamip innuttani Jerusalemimukartaqqunngilai Jehovap naalaffiani pallorfiginnikkiartorlutik. Taamaattumik marlunnik norraasaliorpoq kuultiusunik inuillu naggueqatigiit qulit naalagaaffianniittut taakkununnga guutisioqqullugit. Erniinnaq nunami tamarmi pinerluttuliornersuaqalerpoq inatsisaatsuliorneqalerlunilu.

Aamma naggueqatigiit marluk naalagaaffianni ajornartorsiuteqarpoq. Rehabeamip kunnginngorneranit ukiut tallimat qaangiutinngitsut Egyptenip kunngia Jerusalemimut sorsukkiartorpoq. Jehovap naalaffianit erlinnartorpassuit tiguai. Tassa sivikitsuinnarmik naalaffik sananeqarnermisut ippoq.