NANCHI wayuka ene mambo awe mwanamulume o abena kutabawila kivwalo kyanji mu bitango nyi? Yehoba wamwambijile kuba kino. Awe mwanamulume ke Ahiya, ngauzhi wa Lesa. Nanchi wayuka kwikala ngauzhi byo kulumbulula nyi? Ngauzhi ke muntu Lesa ye abujila jimo bintu bikamwekana kulutwe.

Pano Ahiya waambilenga kwi Yeloboma. Yeloboma wajinga muntu ye basajile kwi Solomone kutangijila mu myanzo imo ya mwingilo wanji wa buntungi. Ahiya byo amusambakene Yeloboma mu mukwakwa, Ahiya waubile kintu kya kukumya. Wakwachile kivwalo kya katataka kyo avwajile ne kwikitabaula mu bitango 12. Waambijile Yeloboma amba: ‘Itolelepo obe mwine bitango jikumi.’ Abya wayuka ene mambo Ahiya o apelejile Yeloboma bitango jikumi nyi?

Ahiya walondolwele’mba Yehoba ukamwangata Solomone bufumu. Waambile’mba, Yehoba ukapana bisaka jikumi kwi Yeloboma. Kino kyalumbulwile’mba kukashalatu bisaka bibiji bikalamwanga na mwana Solomone, aye Lehoboma.

Pa kumvwa bintu Yeloboma byo bamwambijile kwi Ahiya, Solomone wazhingijile bingi. Wakebelenga kumwipaya Yeloboma. Bino Yeloboma wanyemejile ku Ijipita. Pa kupitapo kimye, Solomone wafwile. Waikele pa bufumu myaka 40, bino pa kufwa bamuswaine ku mwananji, aye Lehoboma. Yeloboma byo aumvwine’mba Solomone wafwa, wafumine mu Ijipita ne kubwela jibiji mu Isalela.

Lehoboma kechi wajinga mfumu wawama ne. Aye wakijishemo kutama kukila ne bashanji, abo ba Solomone. Yeloboma ne babinemanga banji bayile kwi Mfumu Lehoboma na kumulomba’mba alamenga bantu bulongo. Bino Lehoboma kechi waumvwine ne. Pano po po akizhizhemo ne kutama. Onkao mambo, bantu bamubikile Yeloboma pa bufumu bwa kulama bisaka jikumi, bino bisaka bibiji bya bena Benjamina ne bena Yuda byalaminwenga na mfumu Lehoboma.

Yeloboma kechi wakebelenga bantu banji kuya ku Yelusalema na kupopwela mu nzubo ya Yehoba ne. Aye walengele baana ba ñombe babiji ne kwambila bantu ba mu bufumu bwa bisaka jikumi kwibapopwelanga. Mu kimyetu kicheche, ntanda yayujile na bumbanzhi ne malwañano.

Kabiji mu bufumu bwa bisaka bibiji namo mwajinga makatazho. Lehoboma byo aikele ke mfumu myaka itanu saka ikyangye kukwana, mfumu wa bena Ijipita waishile mu kulwa na Yelusalema. Wasendele bintu byavula bya buneme bya mu nzubo ya Yehoba. Onkao mambo, kechi papichile ne kimye kyabaya ne, nzubo ya Lesa yashajiletu byonka byo yajinga kimye kyo yashimikilwe.