Esimwititi 65: Uhompa tau gaunuka
ONO diva asi morwasinke ana kutavagwira mugara ogu erwakani lyendi moyinyanyangwidi? Jehova yige ana mu tantere a yi rugane. Mugara ogu kuna kara Ahiya, muporofete gwaKarunga. Wa diva asi yinke muporofete? Age kuna kara muntu ogu a tantere Karunga asi yinke ngayi ka horoka komeho.
Ahiya apa kuna kuuyunga naJerobiyamu. Jerobiyamu kuna kara mugara ogu ana tura Saromo moumpitisili woyirugana yendi yimwe yetungo. Ahiya, apa ana gwanekere naJerobiyamu monzira, ta rugana sininke simwe sokutetura. Ta hutura erwakani lyepe eli ana dwara nokulitaura moyintau 12. Ta tantere Jerobiyamu asi: ‘Ligusira po yintau 10.’ Ono diva asi morwasinke Ahiya ana kupera Jerobiyamu yintau 10?
Ahiya ta faturura asi Jehova ta ka gusa uhompa kwaSaromo. Ta tanta asi Jehova ta ka gava mazimo 10 kwaJerobiyamu. Eyi kuna kutanta asi munwaSaromo Rehabiyamu taga mu hupire po tupu mazimo gavali aga na pangera.
Saromo apa ana zuvhu eyi ga tanterere Ahiya Jerobiyamu, ta handuka unene. Ta hetekere ko kudipaga Jerobiyamu. Nye Jerobiyamu ta dukire koEgipite. Konyima zosiruwo Saromo ta fu. Age kwa kere hompa nomvhura 40, nye ngesi munwendi Rehabiyamu yige va tumbire hompa. Jerobiyamu age moEgipite ta zuvhu asi Saromo ana fu, makura ta tengura koIsraeli.
Rehabiyamu kapisi hompa gomuwa. Age ta tekura vantu nonyanya unene kupitakana oguhwe Saromo. Jerobiyamu novagara vamwe womulyo tava zi kwahompa Rehabiyamu nokumupura asi a tekure vantu nawa. Nye Rehabiyamu kapi ana purakene. Mousili, age ta nyanyene nye kupitakana pwanare. Vantu makura tava tura Jerobiyamu a kare hompa gomazimo 10, nye womazimo gaMbenyameni naJuda taga kara ngorooro naRehabiyamu ngahompa gwawo.
Jerobiyamu kapi ana hara asi vantu vendi va ze koJerusarema va ka kanderere kontembeli zaJehova. Makura ta rugana nontwedu mbali dongorodo nokuninka vantu wouhompa womazimo 10 va di kanderere. Mosiruwogona tupu sirongo tasi zura ukorokotji nonyanya.
Mouhompa womazimo gavali namo tamu kara maudigu. Pwa hana kupita nomvhura ntano kutunda apa ana zi Rehabiyamu mouhompa, hompa gwaEgipite ta wiza a ya rwise Jerusarema. Age ta ya gusa emona lyenzi montembeli zaJehova. Ntembeli tazi kara tupu momukaro ogu za fene apa va zi tungire siruwo sosisupi tupu.
1 Vahompa 11:26-43; 12:1-33; 14:21-31.
Mapuro
- Wolye madina govagara vavali mefano, ntani yiwo wolye?
- Yinke ana rugana Ahiya nerwakani eli ana dwara, ntani sirugana oso yinke asi tanta?
- Yinke ana hetekere Saromo kurugana kwaJerobiyamu?
- Morwasinke vantu va tulira Jerobiyamu a kare hompa gomazimo murongo?
- Morwasinke ana ruganene Jerobiyamu nontwedu mbali dongorodo, ntani konyima yinke yina horokere sirongo?
- Yinke yina horokere mouhompa womazimo gavali ntani nontembeli zaJehova moJerusarema?
Mapuro gokugwederera ko
- Resa 1 Vahompa 11:26-43.
Muntu musinke ga kere Jerobiyamu, ntani yinke ga mu tumbwidilire Jehova nsene nga limburukwire konoveta daKarunga?
- Resa 1 Vahompa 12:1-33.
Kosihonena sosidona saRehabiyamu, yinke nava vhura kulirongera ko vakurona novakuronambunga kuhamena kuruganesa upangeli momudona?
Kwalye nava vhura vadinkantu kugwana mavyukiso gosili naina nsene vana hara kutura po matokoro gomulyo?
Yinke ya tumangedere Jerobiyamu mokutura po mavango gavali goukereli wontwedu, ntani ngapi omu ya likidire ediro epuro mwaJehova?
Yilye ga twaredesere vantu womouhompa gomazimo murongo merwaneso lyoukereli wousili?
