LELO uyukile kisanina yeu mwana-mulume mutwelo wandi? I Yehova wamunena kusana’o. Yeu muntu i Ahiya mupolofeto wa Leza. Le uyukile mupolofeto i ani? I muntu ulombolwa na Leza bintu bikafika kumeso.

Pano Ahiya wisambanga na Yeloboame. Yeloboame i mutūlwe na Solomone mwanda wa kwingila mingilo imoimo ya lūbako. Ahiya walonga kintu kyeni pa kusambakana Yeloboame mwishinda. Wavūla mutwelo wandi mupya ne kwiusana mu bipeta 12. Kupwa walombola Yeloboame amba: ‘Sela byobe bipeta 10.’ Lelo uyukile kyobapēla Yeloboame bipeta 10 kudi Ahiya?

Ahiya wanena’mba Yehova usa kutalula bulopwe kudi Solomone. Kadi’mba Yehova ukapa Yeloboame bisaka 10. Kino kilombola’mba Lehaboma mwanā Solomone ukabikala pa bisaka bibidi kete.

Solomone walobe bininge pa kwivwana byobalombola Yeloboame kudi Ahiya. Penepo watompa kwipaya Yeloboame. Ino Yeloboame wanyemena mu Edipito. Kitatyi kityetye kupita’po Solomone wafu. Wabikele umbula mwa myaka 40, kupwa wandi mwana Lehaboma wabikala. Yeloboame waivwana aye mu Edipito’mba Solomone wafu, penepo wajokela mu Isalela.

Lehaboma ke mulopwe muyampepo. Ususulanga bantu kupita ne shandi Solomone mwine. Yeloboame ne bantu bakwabo bakulumpe abaenda kudi Mulopwe Lehaboma ne kumunena ekale biyampe na bantu. Ino Lehaboma kwivwana mpika. Papo ye pene wabipididila. Penepo bantu ababikika Yeloboame pa bisaka 10, ino bisaka bibidi, kya Benjemani ne kya Yuda, bibashala na Lehaboma bu mulopwe wabyo.

Yeloboame wapeleja bantu bandi kukatōtela mu tempelo ya Yehova idi mu Yelusalema. O mwanda wapunga byana bya ñombe bibidi bya nsahabu mwanda wa bisaka 10 bibitōte. Penepo ntanda ibayula butapani ne bupolapola.

Kadi ne mu bisaka bibidi’mwa namo mudi kavutakanya. Kupwa kubwipi kwa myaka itano ya bubikadi bwa Yeloboame, mulopwe wa Edipito waiya kulwa na Yelusalema. Wasela byabupeta bivule bya mu tempelo ya Yehova. Nanshi tempelo keyalēlepo myaka mivule na buya bwayo.