Chihande 65

Wangana Navaupula

UNEJIVA chuma ou lunga anakupulila lihina muvitenda nyi? Yehova ikiye amulwezele kulingamo. Ou lunga hikapolofweto kaKalunga, Ahiya. Unejiva omwo apwa kapolofweto tahi? Apwa mutu uze navalweza kuli Kalunga vyuma navikasoloka kulutwe.

Ahiya anakuhanjika kuli Yelovowame. Yelovowame ikiye vanahane kuli Solomone mulimo wakutala hakutunga. Ahiya hakuwana Yelovowame hano hajila, himwalinga chuma chakulikomokela. Mwambata lihina lyalihya navwale nakulipula vitenda 12. Hikulweza Yelovowame ngwenyi: ‘Mbataho vitenda likumi.’ Unatachikiza ovyo Ahiya namuhanyina Yelovowame vitenda likumi tahi?

Ahiya mwalumbununa ngwenyi Yehova anakumutambula Solomone wangana. Ngwenyi, Yehova mwamuhana Yelovowame miyachi likumi. Kulumbununa nge mwanaSolomone Lehovowame mwasala nakuyula miyachi yivali kaha.

Solomone hakwivwa vyanahanjika Ahiya kuli Yelovowame, hikutenuka. Mwasaka jino ajihe Yelovowame. Oloze Yelovowame mwachinyina kuEjipitu. Omu hanashimbula chindende, Solomone hikufwa. Apwile mwangana hamyaka 40, jino mwanenyi, Lehovowame, navamupwisa mwangana. Kuze kuEjipitu ali Yelovowame, mwevwa jino ngwavo Solomone nafu, kaha hikukinduluka kuIsalele.

Lehovowame mwangana wamupi. Anakuyanjisa vatu kuhambakana mwayise Solomone. Yelovowame navatu veka vavalemu hinavaya kuli Mwangana Lehovowame nakumulomba atetele vatu. Oloze Lehovowame kate. Luyanjisa lwenyi hikusweza jino. Shikaho vatu hikupwisa Yelovowame mwangana wamiyachi 10, oloze miyachi yivali yaMbenjamine naYuta nayisala namwangana wavo Lehovowame.

Yelovowame kate kwitavisa vatu jenyi kuyanga kuYelusalema nakulemesa Kalunga hatembele yaYehova. Kaha hikutenga mavuvu javangombe vavali nakuvamba vatu vawangana wamiyachi 10 vavalemesenga. Nakushimbula chiku, lifuchi to-o nauhwanga naulyanyi.

Muwangana wamiyachi ivali muli ukalu namukiko nawa. Shimbu kanda Lehovowame achitwame hawangana myaka yitanu, mwangana waEjipitu mweza nakuzunga naYelusalema. Hikumbata vikumba vyavivulu vyamutembele yaYehova. Ngocho nakushimbula chiku, tembele kayeshi nawa nge muze vayitungileko.

Vamyangana 1, 11:26-43; 12:1-33; 14:21-31.