ENGVANGINNGE he mi hian kawrfual a pawh sawm i hria em? Jehovan ti turin a hrilh a ni. He mi hi Pathian zawlnei Ahija a ni. Zawlnei chu enge ni i hria em? A hun hmaa Pathianin enge thleng dawn tih a lo hrilh mi chu a ni.

Hetah hian Ahija chuan Jeroboama hnenah a sawi mek a. Jeroboama chu Solomonan a insak hna thenkhat thawk tura a daha chu a ni a. Ahijan heta kawnga Jeroboama a tawh lai hian, Ahija chuan thil mak tak a ti a. Kawrfual a hak lai chu a phelh a, them 12-ah a pawt thler a. Jeroboama hnenah: ‘I tan them 10 la rawh,’ a ti a. Engvanginnge Ahijan Jeroboama them 10 a pek i hria em?

Ahija chuan Solomona hnen atangin Jehovan ram a la bo dawn tih a hrilh a. Jehovan Jeroboama hnenah hnam 10 a pe dawn a ti a. Chu chu, Solomon fapa Rehoboama awp turin hnam hnih chauh hnutchhiah an ni dawn tihna a ni.

Ahijan Jeroboama thu a hrilh chu Solomonan a hriatin a thinur em em a. Jeroboama tihhlum a tum a. Mahse Jeroboama chu Aigupta-ah a tlan bo va. Rei lo deuh hnuah Solomona a thi a. Kum 40 chhung a lal a, mahse tunah chuan a fapa Rehoboama chu lalbera siam a ni ta. Aigupta-ah Jeroboaman Solomona a thi tawh tih a hria a, tichuan Israel-ah a lo haw a.

Rehoboama chu lal tha a ni lo. A pa Solomona ai mahin mipui hnenah a sual zawk a. Jeroboama leh mi pawimawh thenkhat Lalber Rehoboama hnenah an kal a, mipui chunga tha zawk turin an ngen a. Mahse Rehoboama chuan a ngaithla lo va. Dik takin, a hma aiin a rawn sual zawk a. Chuvangin mipuiin Jeroboama chu hnam 10 chunga lalah an siam ta a, mahse Benjamina leh Juda hnam hnihte chuan Rehoboama chu an lalah an nei a.

Jeroboaman a mite Jerusalema Jehova biak ina Pathian be tura an kal a duh lo va. Chuvangin rangkachak bawng pahnih a siam a, hnam 10 rama mite chu a biaktir a. Ram chu pawikhawihna leh pawngneknain a khat ta thuai a.

Hnam hnih ramah pawh buaina a awm. Rehoboama lal a nih hnu kum nga aia tlemah, Jerusalem do turin Aigupta lai a lo kal a. Jehova biak in atangin ro tam tak a la a. Chutichuan biak in chu sak a nih anga a awm chhung chu rei lote chauh a ni.