¿NEL tnikʼe tiquʼn nkubʼ tlaqe xjal xbʼalin lu? A Jehová xi qʼamante tuʼn tbʼent jlu tuʼn. Atzun Ahíya jlu aju tsanjel Dios (profeta). ¿Ojtzqilaʼn tuʼne tiʼ nbʼant tuʼn jun tsanjel Dios? Nyolen tiʼjju ntzaj tmaʼn Dios te tiʼj aju kbʼajel tuj ambʼil tzul.

Nyolin Ahíya tzalu tukʼe Jeroboán. Aqʼanan Jeroboán tukʼe Salomón. Tej kyjune, moqa tej tkubʼ kykʼlun kyibʼ, Ahíya tukʼil Jeroboán toj bʼe, el tiʼn Ahíya aju akʼaj t-xbʼalen toktaq tiʼj ex kubʼ tlaqin te 12 piẍ. Xi tqʼamaʼn te Jeroboán kyjalu: ‹Qʼinx 10 piẍ teya›. ¿Nel tnikʼe tiquʼn xi tqʼoʼn Ahíya 10 piẍ te Jeroboán?

Xi tmaʼn Ahíya te Jeroboán qa kʼelel tiʼn Jehová kawbʼil te Salomón. Ex qa kxel tqʼoʼn 10 kʼloj kyiyjil aj Israel te Jeroboán. A t-xelen jlu qa oʼkx kabʼe kʼloj kyyajil aj Israel kjel tjaqʼ tkawbʼil Rehoboam aju tkʼwaʼl Salomón.

Tej tok tbʼiʼn Salomón aju otaq txi tqʼamaʼn Ahíya te Jeroboán, tzaj nim tqʼoj tuʼn jlu. Tajtoq tuʼn tkubʼ tbʼiyoʼn Jeroboán, atzunte Jeroboán xi oq toj Egipto. Yajxitl, kyim Salomón. Oteq kawin 40 abʼqʼi kyibʼaj aj Israel, atl Rehoboam ok te ajkawil. Tej tok tbʼiʼn Jeroboán qa oteq kyim Salomón, ajtz meltzʼaj juntl maj tuj tnam Israel.

Mya bʼaʼn kawil te Rehoboam. Mas e kubʼ tyajin Rehoboam xjal tjaqʼ tkawbʼil twitzjo te Salomón aju tman. Eʼx Jeroboán kyukʼe txqantl xjal aʼyejo nim kyoklen tukʼe Rehoboam ex xi kyqʼamaʼn tuʼn tok te tbʼanel kyukʼe xjal. Mixtiʼ xi tbʼiʼn aju xi kymaʼn te. Mas ok ten yajil kye xjal. Tuʼntzojo, ok kyqʼoʼn xjal Jeroboán te kawil kyibʼaj 10 kʼloj kyiyjil aj Israel, oʼkxtl kawen Rehoboam kyibʼaj aj Benjamín ex kyibʼaj aj Judá.

Nyaʼtaq taj Jeroboán tuʼn kyxiʼ xjal kʼulel toj tja Jehová atz Jerusalén. Tuʼntzunju, kubʼ tbʼinchaʼn kabʼe tal wakẍ qʼan pwaq kytxʼotxʼil ex xi tqʼamaʼn kye qeju 10 kʼloj kyyajil aj Israel tuʼn kykʼulin kywitz qe tilbʼilal wakẍ. Lweynaj kubʼ noj tuj tnam tuʼn mya bʼaʼn.

Ax ikx otaq tzaj mya bʼaʼn kyxol qejo kabʼetl kʼloj kyiyjil aj Israel. Menaʼxtoq tel jweʼ abʼqʼi ttzyetlen tkawbʼil Rehoboam, ul ajkawil te Egipto qʼojel tiʼj Jerusalén. Xe tiʼn nim qʼinimabʼil aju tokxteq tuj tja Jehová. Nya nim ambʼil ten tja Jehová ik tzeʼnj tej tbʼaj bʼinchen tnejel.