AʼYANÍ ánni nga nkjínya tísʼinsíni nga tíbʼejnda najño xi yʼa chjota xokji. Jé Jeobá xokitsole. Ahíya ʼmi kʼoa xi nchjaya tsʼe Niná ma. A ʼyaní ʼyáni chjota xi nchjaya ʼmi. Jéní xi tongini kʼoatsole Niná jmeni xi koa̱n.

Ibi jé Jeroboán tífakao Ahíya. Jé Jeroboán tsakánele Salomón nga tsakʼénda kʼale ndʼia. Kʼianga kisatejin Ahíya je Jeroboán ya yandia, tjín xi kisʼin Ahíya. Tsakʼasje je najño chjotse xi yʼakjá kʼoa tejaoya kisʼin. Kitsole Jeroboán: “Teya chjoai”. A ʼyaní ánni nga teya kitsjoasínile Jeroboán.

Ahíya kʼoakitso kʼianga Jeobá kjoaʼale Salomón chjota xi tíbatéxomale. Kʼoakitso nga te ntje̱ tsjoále Niná je Jeroboán xi koatéxomale. Kui xi tsonile nga to jaosa ntje̱ kisatio xi koatexomale je Roboam (Rehoboam) tile Salomón.

Nʼio koanjtile Salomón kʼianga je kinrʼoé jmeni xi kitsole Ahíya je Jeroboán. Koanmele kisikʼien Jeroboán, tonga Jeroboán ya Egipto tsakanga. Xijekoan, kʼien Salomón. Ñachan nó tsakatéxoma, xijekoan, je Roboam tile Salomón xi rey koan. Kʼoa je Jeroboán nga tíjna ya Egipto kisʼejinle nga je kʼien Salomón, kʼoa ijngokʼa kini ya Israel.

Je rey Roboam likui nda tsakatéxoma. Ngisa totaon tsabe chjota tikʼoajinni jokisʼin Salomón je nʼaile. Jeroboán kʼoa kao chjota xi nʼio ʼyale kinrʼoe Roboam nga kʼoakitsole nga likui totaon katabe chjota. Tonga likui kinrʼoéle. Tongisa ti tsʼen koanngáni jokjoan tsakai. Kuinga je chjota te ntje̱ kitsjoasínile Jeroboán nga tsakatéxomale, tonga je ntje̱le Benjamín kʼoa kao tsʼe Judá tojo je Roboam tsakatéxomale.

Je Jeroboán likui koanmele kʼianga ya kikʼétsʼoa je chjota xi tsakatéxomale ya yo̱ngo̱le Jeobá xi kisʼejna ya Jerusalén. Kuinga jao nrajaʼndí xi taonsiné kisindasíni kʼoa kʼoakitsosínile je chjota xi tíbatéxomale nga kui katabʼétsʼoale. Sasa chʼaokisʼinni naxinandá kʼoa nʼio tsʼen koan.

Kʼoati kisʼele kjoa ntje̱ xi ngijao. Kʼianga tojeme aon nó tíbatéxoma Roboam, je rey xi tíjna ya Egipto kichonrʼoe nga kiskan kao Jerusalén. Nʼio nkjín tsojmi chjí xi ya tjíoʼya yo̱ngo̱le Jeobá kikao. Kʼoa tse nga likuiti kʼoakoanchonni yo̱ngo̱ jochon tsakai.