¿MNIJÄˈÄP tiko tyäˈädë jäˈäy yam tkëˈtswaˈxyë tyäˈädë wit? Yëˈë Jyobaa anmääyë ets dëˈën ttunët. Tyäˈädë jäˈäy ja txëˈäjty Aˈiya yëˈë Diosë kyugajpxy. ¿Mnijäˈäp tiko ijty tuˈugë jäˈäy yajtijy kugajpxy? Yëˈko yëˈë Dios anmääyëp ti tunan jatanëp.

Tyäˈädë Aˈiya yëˈë yam myëtmaytyakypyë Jeroboˈan, diˈibë Salomonk nandëˈën yajtuun mä ja Diosë tyëjk ojts kyojy. Ko yam nyaybyatëdë tuˈääjy, ta Aˈiya tjeeny ja wyitë jembyë ta ojts tkëˈtswaˈxy mäjmajtsk pedasë. Ta tˈanmääyë Jeroboˈan: Mats mäjk pedasë. ¿Mnijäˈäp tiko yajmooyë Jeroboˈan mäjk pedasë?

Aˈiya ttukmëtmaytyakyë Jeroboˈan ko Jyobaa yëˈë nety pyëjkëyaambyë kutujkënë Salomonk. Ets ko yëˈë pëjtäˈäganëp ets tˈanaˈamët mäjk grupë jäˈäy mëdë tyëëmp yˈääts. Ets jeˈeyë yˈakwëˈëmët majtsk grupë jäˈäy mëdë tyëëmp yˈääts diˈib yˈanaˈamëbë Reoboˈam ja Salomongë myäänk.

Ko ja Salomonk tnijäˈäjë wiˈixë netyë Aˈiya të tˈanëëmë Jeroboˈan ta jyantsy jotˈambejky, ets tjayaˈooganyë Jeroboˈan, perë Jeroboˈan ta kyeky ets ojts nyejxy Ejiptʉ. Ok ta ojts yˈoˈknë Salomonk. Ja ojts yˈaneˈemy 40 jëmëjt, ets yëˈë netë myäänk Reoboˈam diˈib tëjkë rey. Ko Jeroboˈan tnijäˈäjë ko të yˈoˈknë Salomonk, ta jyëmbijty jatëgok Israel.

Reoboˈam kyaj oy ojts yˈaneˈemy. Niˈigyë tˈaxëktuunyë jäˈäyëty ets kyaj dyëˈënëtyë Salomonk. Päätyë Jeroboˈan ets ja wiingatypyë jäˈäy diˈib ijttëp mëj ojts tninëjxtë ets tˈanmääytyë ets kyaj nëgoo ja jäˈäyëty tˈaxëktunët. Perë Reoboˈam kyaj ojts tmëdoogukë. Niˈigyë jyantsy yˈaxëkjäˈäytyaky. Pääty ja jäˈäy ojts tpëjtäˈäktë ja Jeroboˈan ets tyunët rey mä ja nimäjk grupë jäˈäy mëdë tyëëmp yˈääts. Ets ja Reoboˈam yëˈë yˈanaˈam ja tyëëmp yˈäätsë Bejamingʉ etsë Judaa.

Jeroboˈan kyaj ttsojky ets ja jäˈäy nëjx tˈawdattë Jyobaa jam Jerusalén. Pääty dyaˈoˈoyë majtskë awinax ak oorë dëˈën extëmë tsäjkää maxuˈunk, ets ja jäˈäy tˈawdattët diˈib yëˈë yˈaneˈempy. Ta ko waanë yˈijty ta ja nax käjpn tyuktijky mëdë axëkˈäjtënë.

Nan jamˈäjtë amay jotmay mä ja jäˈäyëty diˈib ja Reoboˈam yˈanaˈam. Pes kyajnëmë nety dyaˈabety mëgoxk jëmëjt mä tyëkë rey, ko myiiny ja rey diˈib Ejiptʉ ets tsyiptuuny mëdë Jerusalén. Ta ojts tmënejxy tijatyë nety jap mä Jyobaa tyëjk, extëmë oorë etsë platë. Pääty ja Diosë tyëjk kyaj dëˈën nyekykyëxeˈky extëm ko ojts yˈoˈoyëtyaˈay.