¿Á XÍNI̱ÚN ndachun xáʼnda válí ta̱yóʼo ti̱ko̱to̱ yóʼo? Jehová ni̱ka̱ʼa̱n xíʼinra ña̱ kaʼndaraña. Ahíya naníra, ta profeta kúúra nu̱ú Jehová. ¿Á xíni̱ún ndáa chiñu kéʼé iin na̱ kúú profeta? Na̱yóʼo kúú na̱ káʼa̱n Ndióxi̱ xíʼin xa̱ʼa ña̱ koo chí nu̱únínu.

Yóʼo káʼa̱n ta̱ Ahíya xíʼin ta̱ Jeroboán. Ta̱ Jeroboán xi̱kuu ta̱ xi̱kachíñu nu̱ú ta̱ Salomón. Tá nda̱kutáʼan ta̱ Ahíya xíʼin ta̱ Jeroboán yichi̱, íyo iin ña̱ʼa ke̱ʼéra. Ta̱vára ti̱ko̱to̱ káni̱ ña̱ ndíxira ta 12 ñáʼñu xa̱ʼnda válíraña. Ta káchira xíʼin ta̱ Jeroboán: ʼKuenta miíún kúú 10 ñáʼñu yóʼoʼ. ¿Á xíni̱ún ndachun ta̱xira 10 ñáʼñu yóʼo ndaʼa̱ ta̱ Jeroboán?

Ta̱ Ahíya káʼa̱nra xíʼin ta̱ Jeroboán, ndí Jehová va̱ása taxikara kaʼndachíñu ta̱ Salomón. Ta ni̱ka̱ʼa̱nra xíʼinra 10 ñuu taxi Ndióxi̱ ndaʼa̱ra ña̱ kaʼndachíñura nu̱úna. Ta u̱vi̱ ñuu ndo̱o ndaʼa̱ ta̱ Rehoboam se̱ʼe ta̱ Salomón ña̱ kaʼndachíñura.

Tá na̱kunda̱a̱-ini ta̱ Salomón ña̱ ni̱ka̱ʼa̱n ta̱ Ahíya xíʼin ta̱ Jeroboán, ni̱sa̱a̱níra. Kúni̱ra kaʼníra ta̱ Jeroboán, ña̱kán xi̱nu ta̱yóʼo ku̱a̱ʼa̱nra ñuu Egipto. Tándi̱ʼi ni̱xi̱ʼi̱va ta̱ Salomón, ta 40 ku̱i̱ya̱ xi̱kuura rey. Ta vitin se̱ʼera ta̱ Rehoboam kúú rey. Tá ndíka̱a̱ka ta̱ Jeroboán ñuu Egipto na̱kunda̱a̱-inira ña̱ ni̱xi̱ʼi̱ ta̱ Salomón, tasaá ndi̱kóra ñuu Israel.

Su̱ví iin rey va̱ʼa kúú ta̱ Rehoboam. Chi ndeéníka kúndiva̱ʼa ta̱yóʼo xíʼin na̱ yiví nu̱úka yivára ta̱ Salomón. Ta̱ Jeroboán xíʼin inka na̱ kúúmií chíñu ku̱a̱ʼa̱nna ka̱ʼa̱nna xíʼin ta̱ Rehoboam ña̱ vií ná koo inira xíʼin na̱ yiví. Ta kǒo kándíxara ña̱ káʼa̱n na̱yóʼo. Ndeéka ki̱xaʼára kúndi̱va̱ʼara xíʼinna. Xa̱ʼa ña̱yóʼo nda̱ka̱xinna ta̱ Jeroboán ña̱ ná kaʼndachíñura nu̱ú 10 ñuu. Soo ta̱ Rehoboam u̱vi̱va ñuu xáʼndachíñura nu̱ú, ñuu na̱ veʼe ta̱ Benjamín xíʼin na̱ veʼe ta̱ Judá.

Ta̱ Jeroboán va̱ása kúni̱ra ku̱ʼu̱n na̱ ñuura ña̱ ndasakáʼnuna Jehová chí ñuu Jerusalén. Ña̱kán i̱xava̱ʼara u̱vi̱ si̱ndi̱ki̱ tí oro ta ni̱ka̱ʼa̱nra xíʼin 10 saá ñuu ña̱ ná ndasakáʼnuna tí yóʼo. Ta vitin ki̱xaʼá íyoní tu̱ndóʼo nu̱úna.

Ta íyonítu tu̱ndóʼo nu̱ú na̱ ñuu ta̱ Benjamín xíʼin na̱ ñuu ta̱ Judá. Tá kúma̱níka xi̱nu ta̱ Rehoboam u̱ʼu̱n ku̱i̱ya̱ ña̱ kúúra rey. Ki̱xi ta̱ rey ñuu Egipto ka̱nitáʼanra xíʼin na̱ ñuu Jerusalén. Ta ku̱a̱ʼání ña̱ʼa Jehová ña̱ íyo ini templo ku̱a̱ʼa̱n xíʼinna. Ña̱kán ña̱ templo yóʼo kǒo íyokaña táki̱ʼva ni̱xi̱yoña tá ya̱chi̱.