Tanojnots 65

Tekiuajyot moxeloj

¿TIKMATI keyej nejin takat kikokototstok nejin taken? Jiova kiiluij maj ijkon kichiuani. Motokaytia Ahíya, itanauatijkauj Dios. ¿Tikmati toni se tanauatijkej? Se aksa tein Dios achtook kimatiltia tein mochiuati.

Nikan Ahíya tajtojtok iuan Jeroboán. Jeroboán katka se takat tein Salomón kikauilijka maj kiitani tekit ika kalchiualis. Keman Ahíya kinamikito ojti Jeroboán, kichiuak se teisa tein amo akin kichiujtoya. Mokixtilij yankuik taken tein kiuikaya uan kitsayanak 12 takoton. Ompa kiiluij Jeroboán: ‘Ximokuili majtakti takoton’. ¿Tikmati keyej kimakak Jeroboán majtakti takoton?

Ahíya kimelauilij ika Jiova yaya kikuiliti itekiuajyo Salomón. Kiiluij ika Dios yaya kimakati Jeroboán majtakti kalyetouanij. Nejin kijtosnekia ika sayoj ome kalyetouanij kinixyekanaskia Roboam (Rehoboam), ikoneuj Salomón.

Keman Salomón kimatik tein Ahíya kiiluij Jeroboán, tel kualanik uan kinekia kimiktis Jeroboán. Sayoj ika yej choloj Egipto. Satepan, Salomón momikilij. Tekiuajtik 40 xiujmej, uan ompa Roboam mochiuak tekiuaj. Keman Jeroboán moajsia Egipto uan kimatik ika Salomón momikilijkaya, oksepa mokepak Israel.

Roboam amo katka se kuali tekiuaj. Okachi kinchiuiliaya tein amo kuali israelitas, amo semi ijkon katka ipopaj, Salomón. Jeroboán uan okseki tayekananij kiitatoj Roboam, uan kiiluitoj maj amo ijkon kinchiuani israelitas. Sayoj ika yej amo kinkakik. Uan okachiok mochiuak amo yolkuali. Yejika israelitas kichiujkej Jeroboán maj kinixyekanani majtakti kalyetouanij, sayoj ika ome kalyetouanij, Benjamín uan Judá, kipiayaj Roboam kemej tekiuaj.

Jeroboán amo kinekia maj israelitas yanij taueyichiuatij Jerusalén itech itemplo Jiova. Yejika kinchijchiuak ome kuakuejkonemej ika oro, uan kinchiuak maj kiniueyichiuanij majtakti kalyetouanij tein kinixyekanaya. Yejika ijsiujka momoyauak eliuisyot uan miak taman tein amo kuali.

No kipiayaj ouijkayomej ome kalyetouanij tein kinixyekanaya okse tekiuaj. Keman Roboam kiuikatoya makuil xiuit kemej tekiuaj, tein tekiuajtia Egipto, kinteuito tein nemiaj Jerusalén. Uan kiuikak miak taman tein tel patiyoj tein kipiaya itemplo Jiova. Yejika templo amo uejkauak yetoya kemej kichijchiujkaj.

1 Reyes 11:26-43; 12:1-33; 14:21-31.