OVE utyii omokonda yatyi omulume ou ekahi nokutandulila otyikutu tyae ovinthimbu? O Yehova wemutuma. Omulume ou o Aija omuuli wa Huku. Okuti utyii oityi omuuli? Omuuli omunthu una Huku atetekela okupopila ovipuka mavikapita komutwe.

Aija ukahi apa nokupopia na Jeroboau. Jeroboau omulume umue ankho Salomau apakele komutue wovilinga viokutunga onondyuo mbae. Etyi Aija ahonyena apa na Jeroboau metapalo, walinga otyipuka etyi uluete polutalatu olu. Wapola otyikutu tyae otyipe ankho avala, etyitandaula ovinthimbu 12. Iya apopila Jeroboau okuti: ‘Tambula ovinthimbu 10 pala ove.’ Utyii omokonda yatyi Aija apela Jeroboau ovinthimbu 10?

Aija wahangununa okuti Yehova mapolo ouhamba pomaoko a Salomau. Wati Yehova maavela Jeroboau omihoko 10. Otyo ankho tyilekesa okuti omona wa Salomau Roboau, matumina vala omihoko vivali.

Etyi Salomau eiva etyi Aija atolela Jeroboau, anumana unene. Aovola okuipaa Jeroboau. Mahi, Jeroboau atilila ko Egitu. Konyima Salomau ankhi. Watumina omanima 40. Iya pahe omona wae Roboau alingi ohamba. Ko Egitu Jeroboau wetyiiva okuti Salomau wankhia. Iya Jeroboau akondoka ko Isilayeli.

Roboau ankho ohamba imue ombi. Ankho ulinga ovanthu omapita unene tyipona tate yae Salomau. Moluotyo, Jeroboau no valume vamue ovanene mo Isilayeli, avaende ko Hamba Roboau. Okukemuita opo atekule nawa ovanthu. Mahi, Roboau katavelele. Nkhele koundingavivi wae ayauisako vali. Moluotyo, ovanthu avalingi Jeroboau ohamba yomihoko 10. Iya omuhoko wa Benjamim nowa Judaa avitualako okutuminwa na Roboau.

Jeroboau ankho kahandele ovanthu vakafendele Yehova kondyuo yae ko Jelusalei. Moluotyo, walinga ononthane onombali mbo olu, opo ovanthu vomihoko 10 vembufende. Mononthiki mbehehi, otyilongo atyiyula oungangala.

Tupu, mouhamba womihoko vivali ankho muna ovitateka ovinyingi. Etyi Roboau alinga ohamba, papita vala omanima ehehi iya ohamba yoko Egitu aiya okulwisa o Jelusalei. Aityindi emona enyingi mondyuo ya Yehova. Ngotyo, ondyuo ya Yehova yakalele vala tyefiwa omanima ehehi.