IU SAVVE why nao disfala man hem brekem kaleko bilong hem? Jehovah nao talem hem for duim olsem. Disfala man hem profet bilong God, A·hiʹjah. Waswe, iu savve wanem nao wanfala profet? Hem man wea God talem hem samting wea bae happen long future.

Long hia A·hiʹjah hem story witim Jer·o·boʹam. Jer·o·boʹam hem wanfala man wea Solomon markem for duim samfala building waka bilong hem. Taem A·hiʹjah hem meetim Jer·o·boʹam long road, A·hiʹjah duim wanfala samting. Hem tekaotem niufala kaleko wea hem werem and brekem long 12-fala pis. Hem sei olsem long Jer·o·boʹam: ‘Tekem 10-fala pis for iuseleva.’ Waswe, iu savve why nao A·hiʹjah hem givim Jer·o·boʹam 10-fala pis?

A·hiʹjah hem talem hao Jehovah bae tekem kingdom from Solomon. Hem sei Jehovah bae givim 10-fala tribe long Jer·o·boʹam. Diswan minim tufala tribe nomoa bae stap for son bilong Solomon, Re·ho·boʹam, for rulim.

Taem Solomon herem samting wea A·hiʹjah talem long Jer·o·boʹam, hem barava kros fogud. Hem trae for killim dae Jer·o·boʹam. Bat Jer·o·boʹam ranawe go long Egypt. Bihaen, Solomon hem dae. Hem king for 40 year, bat then son bilong hem Re·ho·boʹam hem kamap king. Jer·o·boʹam wea stap long Egypt hem herem hao Solomon hem dae finis, so hem kam bak long Israel.

Re·ho·boʹam hem wanfala nogud king. Hem moa raf long pipol winim dadi bilong hem Solomon. Jer·o·boʹam and samfala nara important man olketa go long King Re·ho·boʹam and askem hem for showimaot kaenfala fasin long pipol. Bat Re·ho·boʹam no lisin. Hem barava kamap nogud winim bifor. So olketa pipol mekem Jer·o·boʹam kamap king ovarem 10-fala tribe, bat tufala tribe bilong Benjamin and Judah olketa keepim Re·ho·boʹam olsem king bilong olketa.

Jer·o·boʹam no wantem pipol bilong hem for go long Jerusalem for worship long temple bilong Jehovah. So hem mekem tufala gold buluka and mekem olketa pipol bilong 10-tribe kingdom for worshipim olketa. So land hia hem fulap witim nogud fasin and raf fasin.

Tu-tribe kingdom tu hem kasem trabol. Samfala year bihaen taem wea Re·ho·boʹam hem kamap king, king bilong Egypt hem kam for faet againstim Jerusalem. Hem tekem plande gudfala samting from temple bilong Jehovah. So for lelebet taem nomoa temple hem stap olsem taem wea olketa just buildim.