¿LA AWETAʼM suche wajun achi tijan kutʼoqpij wajun atzʼyaq? Are Jehová xubʼij che, che kubʼan wariʼ. Wajun achi are ajqʼaxal utzij ri Ajawaxel Ahíya ubʼiʼ. ¿La awetaʼm su kubʼij wariʼ? Wariʼ kubʼij che Ajawaxel kubʼij lo che wajun achi ri maja na kbʼanik.

Chiriʼ Ahíya tijan kchʼaw rukʼ Jeroboán. Jeroboán are jun achi che xchakun rukʼ ri Salomón. Chiʼ Ahías xuriq Jeroboán pa bʼe, ¿la awetaʼm su xubʼano? Xresaj ri kʼakʼ ratzʼyaq che ukojom tekʼuriʼ xutʼoqpij xubʼan 12 chʼaqataq che. Tekʼuriʼ xubʼij che Jeroboán: ‹Chakʼama 10 chʼaqataq awech›, xchaʼ che. ¿La awetaʼm suche xuya 10 chʼaqataq che Jeroboán?

Ahías xubʼij che Jeroboán, che Jehová kresaj na ri ajawbʼäl che Salomón. Xubʼij che Ajawaxel kuya 10 tribus che Jeroboán. Wariʼ kraj kubʼij che xa kebʼ tribus kkanaj kan che ukʼojol ri Salomón ubʼiʼ Rehoboam rech kubʼan ajawinel pa kiwiʼ.

Chiʼ Salomón xuta ri xubʼij Ahíya che Jeroboán, sibʼalaj xpe royowal, o riwal. Rumal laʼ xraj xukamsaj ri Jeroboán, rumal wariʼ Jeroboán xanmaj bʼi pa Egipto. Tekʼuriʼ Salomón xkamik. Xubʼan ajawinel pa 40 junabʼ, kimik ri xubʼan ajawinel are ri ukʼojol Salomón ubʼiʼ Rehoboam. Pa Egipto Jeroboán xuta lo che xkam ri Salomón, rumal laʼ xtzalij lo pa Israel.

Rehoboam xa jun itzel ajawinel. Sibʼalaj xubʼan itzelal chike ri winaq, nim chi na chuwäch ri xubʼan ri utat ubʼiʼ Salomón. Rumal laʼ Jeroboán rukʼ nikʼaj chik achijabʼ nim kibʼanik xebʼe rukʼ Rehoboam rech xkebʼij che, che kubʼan ta chi itzelal chike ri winaq. Tekʼuriʼ areʼ xubʼan täj ri kkebʼij. Xa are xubʼan mas itzelal chike ri winaq. Rumal laʼ ri winaq xkebʼan ajawinel che Jeroboán puwiʼ 10 tribus tekʼuriʼ ri täq kebʼ chik tribus rech Benjamín xuqujeʼ Judá are na Rehoboam kajawinel.

Jeroboán xraj täj che ri utinamit kebʼe pa Jerusalén che uyayik uqʼij ri Jehová pa loqʼalaj ja. Rumal laʼ xeʼubʼan kebʼ chiköp rech qʼan pwäq tekʼuriʼ xubʼan chike ri winaq rech ri 10 tribus che kkeya uqʼij wa täq chiköp riʼ. Rumal laʼ pa ri tinamit e kʼo kʼi itzelal, xuqujeʼ chʼoj.

Xuqujeʼ e kʼo kʼi täq kʼäx pa kebʼ tribus. Majana kqʼax jobʼ junabʼ chiʼ ubʼanom ajawinel Rehoboam xpe ri ajawinel rech Egipto che ubʼanik chʼoj rukʼ Jerusalén. Xukʼam bʼi kʼi täq jastaq, o kos, nim ubʼanik rech ri loqʼalaj ja rech Jehová. Rumal laʼ ri loqʼalaj ja naj täj xkanajik junam rukʼ ojer.