¿YACHANKICHU imanasqataq kay runaqa capanta llikipachkan? Jehová Diosmi paytaqa chaynata rurananpaq kamachirqa. Payqa Diosmanta willakuq Ahias sutiyoq runam. ¿Yachankichu pitam sutichanku willakuq nispa? Ñawpaqmantaraq imapas pasananta Diospa nisqanman hina willakuqtam.

Dibujopiqa willakuq Ahiasmi Jeroboanman rimachkan. Jeroboampa allin llamkaq runa kasqanta Salomonqa qawarqa chaymi llamkaqkunapa kamachiqninpaq churarqa. Willakuq Ahiaswan Jeroboam ñanpi tuparuptinmi Ahiasqa hukmanyanapaq hina kaqta rurarqa. Churakusqan mosoq capanta chustukuruspanmi 12 pedazoman llikiparurqa. Hinaspam Jeroboamta nirqa: ‘Hapiy chunka pedazokunata’ nispa. ¿Yachankichu imanasqataq 10 pedazota Jeroboanman qorqa?

Salomonpa kamachikuyninta Jehová Dios qechurunantam willakuq Ahiasqa willarqa. Nirqataqmi 10 ayllupi kamachikunanpaq Diosqa Jeroboamta churarunanta. Hinaptinmi iskay ayllukunallaña qepanqa Salomonpa churin Roboam kamachikunanpaq.

Jeroboanman Ahiaspa imam nisqanta yacharuspanmi Salomonqa llumpayta piñakururqa. Chaymi Jeroboamta wañurachiyta munarqa, hinaptinmi Jeroboamqa Egipto nacionman pasakurqa. Chaymantam Salomonqa wañukurqa. Payqa 40 watam kamachikurqa, chaymantam churin Roboamña kamachikamurqa. Egipto nacionpi Jeroboam kachkaspan yacharurqa Salomonpa wañukusqanta, hinaspanmi Israel nacionman kutimurqa.

Roboamqa manam allin reychu karqa. Payqa taytan Salomonmantapas astawanraqmi runakunata ñakarichiq. Hinaptinmi Jeroboamqa Israel casta runakunapa jefenkunawan Roboanman rispanku nirqaku manaña runakunata llumpayta ñakarichinanpaq. Roboamñataqmi mana uyarispa astawanraq runakunata ñakarichirqa. Chaymi Israel casta runakunaqa 10 ayllukunata kamachinanpaq Jeroboamtaña churarurqaku, ichaqa Juda hinaspa Benjamin ayllukunallapiña Roboamqa gobiernarqa.

Jeroboanmi mana munarqachu kamachisqan llaqtapi runakuna Jerusalen llaqtapi temploman rispa Jehová Diosta yupaychanankuta. Chaymi qorimanta iskay torillokunata rurarurqa Israel casta 10 ayllukuna chaytaña yupaychanankupaq. Chayllam llaqtapiqa mana allin ruraykuna huntarurqa.

Roboampa kamachisqan iskay ayllukunapipas sasachakuykunaqa karqa. Roboam pichqa watamanña kamachichkaptinmi Egipto nacionpi rey hatarimurqa Jerusalen llaqtata atacananpaq. Hinaspam Jehová Diospa templonmanta apakururqa tukuy imakunata. Chaynapimá temploqa manañam qallariypi hinachu karqa.