KUA kite koe e eaa teia tangata i aae ei i tona kakau? Na Iehova i akakite kiaia kia rave i te reira. E peroveta teia tangata no te Atua ko Ahia. Kua kite koe e eaa te peroveta? E tangata ta te Atua i akakite i te ka tupu a te tuatau ki mua.

Te tuatua ra a Ahia kia Ieroboama. Ko Ieroboama te tangata ta Solomona i tuku ei akaaere i tetai o tana au angaanga patu anga. I te aravei anga a Ahia ia Ieroboama i runga i te mataara, kua rave a Ahia i tetai angaanga tuke rai. Kua kiriti aia i tona kakau ou tana e aao ra e kua aeae i te reira e 12 potonga. Akakite aia kia Ieroboama e: ‘Apai koe e 10 potonga naau uaorai.’ Kua kite koe i te tumu i oronga ai a Ahia e 10 potonga na Ieroboama?

Akamarama mai a Ahia e ka rave a Iehova i te patireia mei ia Solomona. Kua karanga aia e ka oronga a Iehova e 10 kopu kia Ieroboama. Te aiteanga, e rua rai kopu ka toe mai no te tamaiti a Solomona ko Rehoboama kia tutara ki rungao.

Te akarongo anga a Solomona i ta Ahia i akakite kia Ieroboama, kua riri tikai aia. Kua tauta aia kia tamate ia Ieroboama. Inara kua oro a Ieroboama ki Aiphiti. I tetai taime i muri mai kua mate a Solomona. E ariki aia e 40 mataiti, i teianei ra kua riro tana tamaiti a Rehoboama ei ariki. I raro i Aiphiti kua akarongo a Ieroboama e kua mate a Solomona, no reira kua oki mai aia ki Iseraela.

Kare a Rehoboama i te ariki meitaki. Kino atu aia ki te iti tangata i tona papa ko Solomona. Kua aere atu a Ieroboama e tetai au tangata puapinga ki te Ariki ko Rehoboama i te pati kiaia kia meitaki mai ki te iti tangata. Inara kare a Rehoboama i akarongo. Te tika, kua kino atu aia i to mua ana. No reira kua akariro te iti tangata ia Ieroboama ei ariki no te kopu 10, inara te kopu e rua o Beniamina e Iuda, ko Rehoboama to ratou ariki.

Kare a Ieroboama e inangaro i tona iti tangata kia aere ki Ierusalema kia akamori i ko i te iero o Iehova. No reira kua maani aia e rua punua puakatoro auro ei akamori na te tangata o te patireia 10 kopu. Kare i roa ana kua ki te enua i te kino e te ta ua.

Kua tupu katoa te manamanata i roto i te patireia o te kopu e rua. Raro mai i te rima mataiti, muri ake i te riro anga a Rehoboama ei ariki, kua tamaki mai te ariki o Aiphiti ia Ierusalema. Kua tari aia i te au apinga memeitaki tikai mei ko i te iero o Iehova. No reira e tuatau poto ua to te iero i te vai ua anga mei te reira rai, i te taime i akatuia ai.