UYATI yini kutsi lendvodza iyidzabulelani lengubo yayo ibe ticephu? Itjelwe nguJehova kutsi iyidzabule. Lendvodza yayingumphrofethi waNkulunkulu longu-Ahiya. Uyati kutsi uyini umphrofethi? Ungumuntfu Nkulunkulu lamtjela intfo letawenteka kusasele sikhatsi lesidze kutsi yenteke.

Ahiya ukhuluma naJerobowamu kulesitfombe. Jerobowamu kwakuyindvodza Solomoni layibeka kutsi yengamele lomunye umsebenti wakhe wekwakha. Batsi nabahlangana endleleni bo-Ahiya naJerobowamu, Ahiya wenta intfo lesimanga. Wakhumula lengubo lensha abeyigcokile wayidzabula yaba ticephu letingu-12. Wase utsi kuJerobowamu: ‘Titsatsele ticephu tibengu-10.’ Uyati kutsi kungani Ahiya anika Jerobowamu ticephu letingu-10?

Ahiya wamchazela kutsi Jehova utawutsatsa umbuso kuSolomoni. Watsi Jehova utawunika Jerobowamu tive letingu-10. Loku kwakusho kutsi timbili nje kuphela tive letitawusala tibuswa yindvodzana yaSolomoni lenguRehobowamu.

Nakakuva Solomoni loko Ahiya lakutjela Jerobowamu, watfukutsela kakhulu. Wetama ngisho nekumbulala Jerobowamu, kodvwa wabaleka waya eGibhithe. Ngemuva kwesikhatsi, Solomoni wafa sekabuse iminyaka lengu-40 budzala. Indvodzana yakhe lenguRehobowamu, yabese iba yinkhosi esikhundleni sakhe. Lena emuva eGibhithe Jerobowamu weva kutsi Solomoni sewufile, wabese sewubuyela eveni laka-Israyeli.

Rehobowamu abengesiyo nani inkhosi lenhle. Bantfu abebaphatsa kabi kwendlula ngisho babe wakhe Solomoni. Jerobowamu nalamanye emadvodza labalulekile, baya eNkhosini Rehobowamu bayincenga kutsi ibaphatse kahle bantfu. Rehobowamu akalalelanga, esikhundleni saloko wabaphatsa kabi kakhulu kunakucala. Ngako bantfu babeka Jerobowamu kutsi abe yinkhosi yetive letingu-10, kodvwa tive letimbili, sakaBhenjamini nesakaJuda, tona tasala tibuswa nguRehobowamu.

Jerobowamu abengafuni kutsi bantfu bakhe baye eJerusalema kuyokhonta Jehova ethempelini. Ngako watakhela ematfole egolide lamabili kuze bonkhe bantfu baletive letingu-10 bakhulekele wona. Ngekushesha lonkhe live lagcwala bugebengu nebudlova.

Ngisho nasembusweni wetive letimbili, kwakunetinkinga. Kungakapheli neminyaka lesihlanu Rehobowamu acalile kubusa, inkhosi yaseGibhithe yeta yatowulwa nebaseJerusalema. Yatsatsa umcebo lomnyenti ethempelini laJehova. Ngako-ke, kwatsatsa sikhashana lithempeli likulesimo lelalikuso ngalesikhatsi lisakhiwa.