¿WAN maʼ xa naʼa jas yuj ja winik it wan xchʼitalajel xentik yaman ja kʼuʼal it? Yeʼna Jyoba ja maʼ yala yabʼ a-skʼuluk jachuk. Yeʼn ja Ahíya ja aluman bʼa Dyos. ¿Wan maʼ xa naʼa jas wa sbʼejan jun aluman? Wa sbʼejan june maʼ wa x-alji yabʼ yuja Dyos ja jasa ojto ekʼuki.

Ja bʼa dibujo, ja Ahíya wan loʼil soka Jeroboán, ja yeʼn jun lekil yaʼtum ja Salomón. Yajni Ahíya staʼa sbʼaj sok ja Jeroboán bʼa bʼej skʼulan jun jasunuk bʼa chamyabʼjel: ya eluk ja yajkʼachil skʼu slapuneji sok xchʼitalan bʼa 12 xentik yaman. Yala yabʼ ja Jeroboán: «Iʼaj lajune xetʼan». ¿Wana maʼ xa naʼa jas yuj yaʼ yi lajune xetʼan ja Jeroboán?

Ahíya xcholo ja Jyoba oj sjapyi ja smandaranel ja Salomón. Yala ja Dyos oj yaʼ yi lajune kʼole ja Jeroboán. Ja it wa sjeʼa ja Rehoboam, ja skerem ja Salomón, kechanxta wa xkansok chabʼ kʼole bʼa oj ya ja smandari.

Yajni Salomón yabʼ ja jasa alji yabʼ ja Jeroboán yuja Ahíya, jel tajki. Sleʼa modo bʼa oj smil ja Jeroboán, pe ja yeʼn spaka ajnel bʼa Egipto. Tsaʼan ja Salomón chami. Ajyini mandaranum 40 jabʼil. Jaxa weʼgo Rehoboam, ja skeremi, yeʼnxa mandaranum. Jeroboán tini ay bʼa Egipto yajni yabʼ chamta ja Salomoni, ja yuj ja yeʼn kumxi bʼa Israel.

Rehoboam mini jun lekil mandaranum. Ja yeʼn jelxel xa ja smodo soka ixuk winiki yuja jastal skʼulan ja stat Salomoni. Ja yuj Jeroboán sok tuk ansyanoʼik waj skʼan-e yi ja Rehoboam mok ixta yil ja ixuk winiki. Pe ja yeʼn mini skisaʼa, ipaxiʼele. Ja yuj ja ixuk winiki yawe och mandaranum ja Jeroboán bʼa oj ya mandar ja bʼa lajune kʼole israʼelenyo. Pe ja bʼa chabʼ kʼoleʼi: ja Benjamín soka Judá, yeʼntoni mandaranum ja Rehoboam.

Jeroboán mi skʼana ja chonabʼi oj waj yaʼteltaye ja Jyoba bʼa templo bʼa Jerusalén. Ja yuj sjeka skʼuljel chabʼ beserro bʼa oro sok skʼulan ja ixuk winik bʼa lajune kʼole israʼelenyo ayaʼteltaye. Ja chonabʼi weʼgoxta bʼutʼ-el spekʼjel chikʼ.

Chomajkil ja bʼa chabʼ kʼole wan yajel mandar ja Rehoboam wani ekʼel sbʼaje wokol. Mito ay joʼe jabʼil ochel mandaranum yajni ja mandaranum bʼa Egipto soka skʼakʼanum jakye bʼa oj tiroʼanuke soka chonabʼ Jerusalén. Jel jitsan ja jastik junuk yiʼaje ja bʼa stemplo ja Jyoba. Ja yuj ja templo mixa ni kan jastal ajyiʼa.