¿KATSIYA tuku xlakata uma chixku lakxtitma xlhakgat? Jehová wanilh chuna katlawalh. Uma chixku wanikan Ahíya xpalakachuwina Dios. ¿Katsiya wix, tuku chatum palakachuwina? Palakachuwina wanikan wantiku Dios makatsiniy tuku aku nalay.

Unu Ahíya tachuwinama Jeroboán. Jeroboán chatum chixku wantiku Salomón lilaksakli napulalin taskujut, akxni xtlawamaka templo. Akxni Ahíya tatanokglhli Jeroboán anta ktiji, xalan tsukulh lakxtita xasasti xlhakgat nema xlin chu laktsu laktsu lakxtitli makkutiy tlawalh. Ahíya waniy Jeroboán: Katiya makkaw laktsu lhakgat mila nawan. ¿Katsiya wix tuku xlakata maxkilh makkaw laktsu lhakgat Jeroboán?

Ahíya waniy pi Jehová namakglhtiy Salomón xtamapakgsin. Ahíya waniy Jeroboán pi Dios namaxkiy namapakgsiy pulakkaw laklanka familia. Uma wamputun pi kaj tamputiy laklanka familia natamakgxtakgniy Roboam (Rehoboam) xkgawasa Salomón xlakata namapakgsiy.

Akxni Salomón katsilh tuku Ahíya waninit Jeroboán, lu snun sitsilh. Makgniputun Jeroboán, pero xla tsalalh kʼEgipto. Alistalh Salomón nilh. Mapakgsinalh tipuxum kata, chu Roboam xkgawasa Salomón, tsukulh mapakgsinan. Chu Jeroboán katsicha kʼEgipto pi Salomón ay ninit, wa xlakata taspitpa kʼIsrael.

Reboam nixatlan mapakgsina. Tlakg lixkajni likatsiy nixawa xtlat Salomón. Jeroboán chu amakgapitsi lakchixkuwin tiku na lanka xlakatsukutkan lakgankgolh Roboam chu skinikgolh pi tlan kakalikatsinilh kristianos. Pero Roboam ni kuenta katlawanilh. Chu tlakg lixkajni tsukulh likatsiy. Wa xlakata kristianos xmapakgsinakan tlawakgolh Jeroboán xapulakkaw laklanka familia. Chu amakgapitsi tamputiy laklanka familia, Benjamín chu Judá watiya xmapakgsinakan Roboam.

Jeroboán nilakgatiy pi kachikin tiku kamapakgsiy naʼankgoy kJerusalén kxtemplo Jehová xlakata nakakninankgoy. Wa xlakata litlawalh oro tantuy laktsu toro chu tlawalh pi kristianos tiku xalak pulakkaw laklanka familia nakakninanikgoy. Lakapara kachikin litatsamalh tiku lakatsalakgoy limapakgsin chu tiku ni machokgoy xtasitsi.

Nachuna anan takglhuwit kxtamapakgsin xatamputiy laklanka familia. Ni para akgkitsis kata titaxtulh akxni chalh xlimapakgsina Roboam, milh xmapakgsina xalak Egipto katalachipay li Jerusalén. Chu lilh tuku laklanka kxtapalh nema xwi kxtemplo Jehová. Wa xlakata templo ni lu makgas tawi la pulana xwi.