¿YABAL anaʼ bin yuʼun te yak ta sjatsel te mukʼul kʼuʼul te winik ini? Jaʼnix albot yuʼun te Jehová te jichuk ya spase. Te winik ini Ahías (Ahíya) te sbiile, jaʼ jtul j-alwanej yuʼun te Diose. ¿Yabal anaʼ te bin ya skʼan ya yal te kʼopil j-alwaneje? Jaʼ te machʼa ay bin ya x-akʼbot snaʼ yuʼun Dios te kʼalal mato kʼoem ta pasel-ae.

Ya xjuʼ ya kiltik liʼ ini te yak ta kʼop te Ahías sok te Jeroboam (Jeroboán). Te Jeroboam jaʼ jtul winik te aʼtej ta stojol te Salomone. Te kʼalal la sta sbaik ta be te Ahías sok te Jeroboam, ay bin-a te chajpnax la spase. La slokʼes te yachʼil smukʼul kʼuʼ te slapoj te Ahiase sok la sjats lajchayeb lokʼ yuʼun-a. Jich la yalbey te Jeroboam: Tsaka te lajunjatse. ¿Yabal anaʼ bin yuʼun te la yakʼbey te lajunjats te Jeroboame?

Te Ahías la scholbey skʼoplal te bitʼil te Jehová ya spojbey te mantaltesel yuʼun te Salomone. La yal Dios te ya yakʼbey lajunchajp stsʼumbal Israel te Jeroboame. Te bin ya skʼan ya yal ini jaʼ te jaʼxanix chaʼchajp stsʼumbal Israel te ya swentain jilel te Roboam (Rehoboam) te snichʼan te Salomone.

Te kʼalal la snaʼ stojol te Salomón te bin albot yuʼun Ahías te Jeroboame kʼax ilin yuʼun. Jaʼ yuʼun kʼan smil, jaʼukmeto lokʼ bael ta anel ta Egipto te Jeroboame. Ta patil laj te Salomone, mantalteswan 40 jaʼbil. Tey-abi jaʼ och ta ajwalil te snichʼan Roboam. Kʼalalto ta Egipto la yaʼiy stojol Jeroboam te lajix te Salomone, jaʼ yuʼun sujt tal ta Israel.

Ma lekil ajwaliluk te Roboame. Jaʼ kʼax tulanxan yoʼtan la yakʼ sba ta stojol te ants winiketik te bitʼil la spas te state. Te Jeroboam sok yantik winiketik te mukʼ skʼoplalike bajtʼ skʼoponik te Roboam, la skʼambeyik te lekuk yoʼtan sok te ants winiketike. Jaʼukmeto maba ichʼotik ta mukʼ yuʼun. Kʼax chopol la spasxan sba-a te bitʼil ta nailale. Jaʼ yuʼun te ants winiketik la yotsesik ta ajwalil te Jeroboam jich la swentain te lajunchajp stsʼumbal Israel, jaʼukmeto te chaʼchajp stsʼumbal Israel te Benjamín sok Judá jaʼ jilik ta wentainel yuʼun te Roboame.

Te Jeroboam ma la skʼan te ya xbajtʼik ta Jerusalén te ants winiketik ta yichʼel ta mukʼ te Jehová ta Temploe. Jaʼ yuʼun la spas chaʼkojt jkolel toro ta oro yuʼun jich la yakʼbey yichʼ ta mukʼ te lajunchajp stsʼumbal Israel. Maba jalaj te noj ta mulil sok ta utsʼinwanej te lume.

Jaʼnix jich ay wokolil te banti wentaimbilik te chaʼchajp stsʼumbal Israele. Te kʼalal mato xlokʼ joʼeb jaʼbil yochel ta ajwalil-a te Roboame, te ajwalil yuʼun Egipto tal yakʼbey guerra te lum Jerusalene. Jich la yichʼik bael te kʼulejalil te ay ta Templo yuʼun te Jehovae. Jich maba jalaj te bitʼil tʼujbil ay ta snailal-a te Temploe.