Mwaha 65: Okawanyeya Wa Omwene
NYUWO munnisuwela nthowa naya mulopwana ola vanikhera awe nlaya nawe? Yehova aahimuhimeerya opaka ela. Mulopwana ola Ahiya orii mprofeta a Muluku. Nyuwo munnimusuwela mprofeta tanii? Orii mutthu yoole Muluku onimuleela awe vahinatthi yeele enrowa wiiraneya muhoolo.
Va, Ahiya onilavula ni Yerobowamu. Yerobowamu orii mutthu yoole Salomoni aamuhiyenrya awe oweherya miteko sawe sikina sa oteka. Vaavo Ahiya vanikumana awe mphironi ni Yerobowamu, Ahiya onipaka etthu yoohilimaleleya. Owo onirula nlaya nawe nisyaa nenno niwanrya awe ni onikhera mipantta 12. Owo onimuleela Yerobowamu wira: ‘Nyuwo mukuxee mipantta 10.’ Nyuwo munnisuwela nthowa naya Ahiya vaninvaha awe Yerobowamu mipantta 10?
Ahiya onitthokiherya wira Yehova onrowa okumiha omwene wa Salomoni. Owo onihimya wira Yehova onrowa onvaha Yerobowamu mahimo 10. Ela enitaphulela wira paahi mahimo manli anrowa ohiyeriwa Robowamu mwaana a Salomoni wira olamuleleke.
Vaavo Salomoni vaniiwa awe yeele Ahiya yaamuhimenrya awe Yerobowamu, owo onninanariwa vanceene. Owo onneererya omwiiva Yerobowamu. Masi Yerobowamu onitthyawela wEjiitu. Nuuvira okathi vakhaani Salomoni onnookhwa. Owo aahikhala mwene iyaakha 40, masi vano mwanawe Robowamu onipakiwa mwene. Oryeene wEjiitu Yerobowamu onniiwa wira Salomoni ohookhwa, siiso owo onnihokolowela wIsarayeli.
Robowamu khahiyo mwene ooloka. Owo orii-tho ootakhala wa atthu onvikana tiithi awe Salomoni. Yerobowamu ni atthu akina ootthuneya anirowa wa Mwene Robowamu ni onvekela wira okhalee ooreerexa murima wa atthu. Masi Robowamu khoniwiriyana. Mwekeekhai, owo onikhala ootepa otakhala ovikana khalai. Siiso atthu animpaka Yerobowamu okhala mwene a mahimo 10, masi mahimo manli a Beniyamini ni Yuda anikhalana Robowamu ntoko mwene aya.
Yerobowamu khoniphavela wira atthu awe arowee oYerusalemu wira yakokhorele mu empa ya Yehova. Siiso owo onaapaka axinyompe anli a eweero ni owiiriha atthu a omwene a mahimo 10 wira yaakokhoreleke. Niinanoru elapo enisareya otakhala ni ohaaxana.
Vaakhala-tho muxankiho moomweneni wa mahimo manli. Moohiphiyerya iyaakha thanuu vattuli va Robowamu okhala mwene, mwene a wEjiitu onnoorwa owana ni Yerusalemu. Owo onnikuxa mihakhu sinceene mu empa ya Yehova. Siiso waari okathi wa vakhaani paahi empa ya Muluku yaavikaninha aya okhala ntoko saatekiwa aya.
1 Mamwene 11:26-43; 12:1-33; 14:21-31.
Makoho
- Masina aya tanii alopwana ala anli valataratoni va, nto tanii ala?
- Ahiya oniiriha exeeni nlaya niwanrya awe, nto yoowiira eyo entaphulela exeeni?
- Salomoni oneererya omwiiriha exeeni Yerobowamu?
- Nthowa xeeni atthu animpaka aya Yerobowamu okhala mwene a mahimo mulokoo?
- Nthowa xeeni Yerobowamu onaapaka awe axinyompe anli a eweero, nto eniiraneya exeeni ni elapo ekhumelelakaru eyo?
- Exeeni eniiraneya ni omwene wa mahimo manli ni empa ya Yehova oYerusalemu?
Makoho oowuncererya
- Mmusome 1 Mamwene 11:26-43.
Yerobowamu aari mutthu a mukhalelo xeeni, ni natiri xeeni Yehova ammanenlya awe akhala wira anvikaniha wiiwelela malamulo a Muluku? (1 Mam 11:28, 38)
- Mmusome 1 Mamwene 12:1-33.
Mu ntakiheryo noohiloka na Robowamu, etthu xeeni eniixutta aya axitiithi ni axitokweene voohimya sa opuherya okhulupale? (1 Mam 12:13; Mus 7:7; 1 Ped 5:2, 3)
Ti waani anitthuneya aya amiravo olelo orowela yoolakiherya yoororomeleya vaavo vanipaka aya soothanla suulupale mookumini? (1 Mam 12:6, 7; Mir 1:8, 9; 2 Tim 3:16, 17; aHeb 13:7)
Exeeni yaamwiirinhe Yerobowamu opaka mapuro manli a omukokhorela mwaanyompe, nto moota xeeni ela yooniherya aya othoiwa wuulupale wa omwaamini Yehova? (1 Mam 11:37; 12:26-28)
Tanii aahoolenle atthu a omwene wa mahimo mulokoo mu orukunuwela okokhorela wekeekhai? (1 Mam 12:32, 33)
