Fanjakan̈a Nirasain̈a Aroe
Tantara 65
Fanjakan̈a Nirasain̈a Aroe
HAINAO nan̈ino lamba io nitriatriarin’ny lelahy io? Jehovah nan̈iraka izy nan̈ano zen̈y. Lelahy io mpaminan̈in’ny Zan̈ahary. Ahia an̈arany. Mba hainao ino mpaminan̈y zen̈y? Izio olo araiky ivolan̈an’ny Zan̈ahary raha mbala ho avy.
Ahia io mikoran̈a amy Jeroboama. Jeroboama io lelahy araiky nirahin’i Solomona nikarakara fiasan̈a tran̈onany. Ahia koa fa fanôjy Jeroboama tamy lalan̈a io, nisy raha hafahafa nataony. Nadosony lambanany tambelan̈a, baka iô nitriatriariny 12. Volan̈iny tamy Jeroboama: ‘Alaiva ninao, folo aminany ty.’ Hainao nan̈ino Ahia nan̈amia Jeroboama tsilambalamba folo?
Ahia nan̈azava fa adoson’i Jehovah amy Solomona fanjakan̈a. Izy nivolan̈a fa Jehovah han̈amia Jeroboama fanjakan̈an’ny foko folon’Israely. Dikan’izen̈y, Rehoboama, zanaka Solomona, nanjaka tamy foko aroe hafa.
Solomona koa fa naharen̈y raha jiaby zen̈y, izy neloko farany mare. Ke izy nitetiky hamono Jeroboama. Jeroboama nilefa ta Ejipta. Koa fa nandeha andra, naty Solomona. Tan̈atin’ny 40 taon̈o izy nanjaka, fa Rehoboama zanany nandimby izy. Jeroboama koa fa naharen̈y fa naty Solomona, izy nimpody tan’Israely.
Rehoboama io ampanjaka ratsy fan̈ahy. Izy nampijaly olo lombolombon’ny babany, Solomona. Jeroboama ndreky olo manam-pahifan̈a sasany nandeha tamin’Ampanjaka Rehoboama tan̈y, hivolan̈a aminany fa izy tsy tôkony sarôtiny amin’olo indesiny. Rehoboama tsy nijery zen̈y. Ndray izy nahay ratsy fan̈ahy fo! Jeroboama baka tiô nataon’olo ampanjakan’ny foko folon’Israely. Fokon’i Benjamina ndreky Joda fo nan̈eky Ampanjaka Rehoboama.
Tsy tian’i Jeroboama olonany handeha Jerosalema, hivavaka amy tempolin’i Jehovah. Zen̈y nahavy izy niasa zanak’aomby volamena aroe hivavahan’olo. Tsy ela, nahaimaro mpamono olo ndreky olo kafiry.
Foko aroen’Israely in̈y koa mba sahiran̈a. Tsendriky ampy dimy taon̈o zay Rehoboama nanjaka, ampanjakan’Ejipta navy hiady tamy Jerosalema. Maro raha tamy tempolin’i Jehovah tao nindesiny. Ke tsy nahadin̈y ela hatsaran̈an’ny tempoly vo namboarin̈y in̈y.
1 Mpanjaka 11:26-43; 12:1-33; 14:21-31.
