ANA akumanyilila ligongo lyakwe munduju akupapulanya mkanjo wakwe yipisya? Yehofa ni jwamsalile kutenda yeleyo. Munduju ali Ahiya jwakulocesya jwa Mlungu. Ana akumanyilila kuti jwakulocesya ali nduni? Ali mundu jwele Mlungu akusamsalila yaciyitendekwe m’bujo

Pelepa Ahiya akuŵeceta ni Yelobowamu. Yelobowamu ali mundu jwele Solomoni ŵam’ŵisile kulolela masengo gane gakutaŵataŵa. Ahiya pakucingangana ni Yelobowamu petalapa, Ahiya akutenda cindu cakusimonjesya. Akuwula mkanjo wakwe wasambano ŵawete ni akuwupapulanyapapulanya yipisya 12. Ni akumsalila Yelobowamu kuti: ‘Mjigale yipisya 10.’ Ana akumanyilila ligongo lyakwe Ahiya akumpa Yelobowamu yipisya 10?

Ahiya akuŵeceta kuti Yehofa casumule ucimwene kwa Solomoni. Akusalasoni kuti Yehofa capelece mitundu 10 kwa Yelobowamu. Yeleyi yikugopolela kuti mwanace jwa Solomoni Lehobowamu, cagambe kusigala ni mitundu jiŵili jacajilamulileje.

Solomoni papikene yasasile Ahiya kwa Yelobowamu, akutumbila mnope. Jwalakwe akusaka kum’wulaga Yelobowamu. Nambo Yelobowamu akutilila ku Eguputo. Pajikupita ndaŵi Solomoni akuwa. Jwalakwe aŵele mwenye kwa yaka 40, nambo sambano mwanagwe Lehobowamu akuŵa mwenye. Yelobowamu pali ku Eguputo akupikana kuti Solomoni awile, m’yoyo akuwujila ku Yisalayeli.

Lehobowamu ali mwenye jwakusakala. Jwalakwe akwalagasya ŵandu mpela mwaŵatendelaga Solomoni babagwe. Yelobowamu ni acakulungwakulungwa ŵane akwawula kwa Lehobowamu kukum’ŵenda kuti ŵalamulileje cenene ŵandu. Nambo Lehobowamu ngakupikanila. Mmalo mwakwe jwalakwe akupundanganya kwalagasya ŵandu. M’yoyo ŵandu akum’ŵika Yelobowamu kuŵa mwenye jwa mitundu 10, nambo mitundu jiŵili ja Benjamini ni Yuda jikwendelecela kulamuligwa ni mwenye Lehobowamu.

Yelobowamu ngakusaka kuti ŵandu ajawuleje kukulambila Yehofa kunyumba jakulambilila ku Yelusalemu. Sambano akupanganya ŵanace ŵaŵili ŵa golidi kuti mitundu 10 ja mu ucimwene wakwe jilambileje. Mwacangakaŵa cilambo cikugumbala ni ŵandu ŵakasa malamusi, soni ŵakuwulasyana.

Maucimwene gaŵili gosopega gali mu yipwetesi. Mkaniyimale yaka msano Yelobowamu ali mwenye, mwenye jwa ku Eguputo akwika kukumenyana ni Yelusalemu. Mwenyejo akujigala yindu yejinji ya m’nyumba jakulambilila Yehofa. Ni mwangacelewa m’nyumbamu mukuŵa mwangali yindu yine.